УДЭТ-ын уран бүтээлчид “Хаадын хаан Чингис хаан” физикл перформансыг найруулагч Э.Билгүүний найруулгаар үзэгчдэд хүргэх гэж байна. “Хаадын хаан Чингис хаан” физикл перформансыг ирэх наймдугаар сарын 17-нд ганцхан удаа толилуулах аж.
Хиад овгийн Есүхэй баатар Татар аймагтай тулалдан Тэмүүжин Үгэ, Хори буха баатруудыг ялна. Түүний хатан Өэлүн эхийн хэвлийд бүрэлдэх хүүхдийг “Мөнх хөх тэнгэр их хувь заяатныг илгээж байна” хэмээн их зайран зарлав. Онон мөрний хөвөөнд баруун гартаа нөж атган Есүхэй баатрын хүү Тэмүүжин мэндэлнэ.
Есүхэй баатар Хонгирад аймгийн ноён Дай Сэцэнийд саатахдаа түүний охин Бөртэг хүү Тэмүжинтэй ураг барилдуулж, сүй тавина. Есүхэй баатрыг Татаруудад хорлогдон нас барсны дараа тэдний гэр бүлийг овог аймаг нь орхиж, Өэлүн эх хүүхдүүдээ эв нэгдэлтэй, тэсвэр хатуужилтай, зоригтой хүн болгон өсгөнө. Тэмүүжин эцэг нэг, эх ондоотой Бэгтэр ахыгаа загас булаацалдан нумаар харваж хорооно.
Тэмүүжин эрийн цээнд хүрээд Бөртэг гэргийгээ болгоно. Мэргидүүд Бөртэг олзлон авч явсан ч Тэмүүжин Жамуха, Ван хан Тоорил нарын тусламжтайгаар дайтаж эхнэрээ буцаан авна. Бөртэ нь Чингис хааны хамгийн итгэлт хань байж, Зүчи, Цагаадай, Өгөдэй, Тулуй хэмээх дөрвөн хүүг төрүүлэв. Чингис хааны дөрвөн хүү эр бяраа гайхуулж, тэмцэлдэн байхад нь “Эвтэй байгтун, бие биеэ түшиглэ. Монголын эзэнт гүрний төрийн жолоог залах хөвүүд минь” гэж хэлээд аян дайнд мордоно.
Жамуха өөрийгөө Гүр хаанд тунхаглаж гурван удаа анд барилцсан Тэмүүжинээс андын тангаргаа зөрчсөн тул хорооно. Жамухыг хороосондоо ихэд харамсан эртний ёс заншлын дагуу хүндэтгэлтэйгээр оршуулна.
Тэмүүжиний сэтгэл үймэрч Өэлүн эхийн дуу хоолой салхиар дамжин сонсогдож эзэнт гүрнийг нэгтгэх хүч, итгэл найдварыг өгнө. 1206 онд Тэмүүжин Монголын аймгуудыг нэгтгэн, Чингис хаан хэмээх цолыг хүртжээ. Түүний суу алдар дэлхий ертөнцөд тархана.
