Гүн их санаашрал минь
Оддын дундах зуун гэрэл минь
Харваж буй хүсэл
Хаа сайгүй нуугдаж тоглох чимээгүй догдлоон минь
Электрон шуудангийн цаадах зөөлхөн инээмсэглэл
Энд тэндгүй үсчих ягаахан бодол минь
Өдөр бүрийг ганцаар алхаж өнгөрүүлэх
Өрөөн дотуур тарсан, шинэхэн шүлэг минь
Хаа холын төсөөллийн ертөнц
Хамаг бүхэн минь.
Чиний инээмсэглэлээр би ундалдаг
Чиний уруулаас дарс амталдаг
Өдөр бүхэн ил байдаггүй чимх аз жаргалаас чинь
Бурханыг олж үздэг
Өмнө минь ширтдэг нүдэн дотроос чинь
Өөрийгөө олж хардаг.
Цэл залуухан зүрх
Цэцэгс, гудамжны цаадтайх цор ганц ногоон гацуур
Дэргэдүүр нь өнгөрөх бүрт эгшиглэдэг
Гүн уйтгарт хаврын ахуй минь
Чиний нуугдсан чулуун хөшөөн дундаас
Зүрхээ хайж олдог
Чиний хамт алхдаг замын хажуугаас шүлэг түүдэг.
Миний тас хар нүдэт, анир, амгалан минь
Цагаан гэрэл, хотын шөнө дундах нам гүм
Чихэнд уянгалах сонгодог аяз
Мэдрэхгүй өнгөрүүлж, орхиж, одож, мартаж огт зүрхлэхгүй
Мэдрэмж минь.
Электрон шуудангийн цаадах зөөлхөн инээмсэглэл
Энд тэндгүй үсчих ягаахан бодол минь
Өдөр бүрийг ганцаар алхаж өнгөрүүлэх
Өрөөн дотуур тарсан, шинэхэн шүлэг минь…
www.URLAG.mn
