Эх хэлний өдрийг тохиолдуулан Ховд аймгийн Жаргалант сумын ерөнхий боловсролын сургуулийн 10-12 дугаар ангийн сурагчдын дунд “Би үндэсний бичгээ мэднэ” уралдааныг зохион байгуулж, таван сургуулийн 30 сурагч мэдлэг, чадвараа сорилоо.
Монгол Улс жил бүрийн есдүгээр сарын 1-нийг Эх хэлний өдөр болгон тэмдэглэдэг. Энэ жил Эх хэлний өдрийг угтан үндэсний бичгийн хэрэглээг нэмэгдүүлэх, сурагчдын зөв бичих мэдлэг, чадварыг дээшлүүлэх зорилгоор Ховд аймгийн ЗДТГ, Цэргийн штаб, Боловсролын газар, Жаргалант сумын ЗДТГ хамтран тус уралдааныг энэ сарын 18-нд зохион байгуулсан байна.
Уралдаанаар сурагчдын үндэсний бичгээр зөв бичих, унших, хөрвүүлэх болон дүрс ялган бичих чадварыг сорьж, нийт долоон төрлөөр өрсөлдүүлжээ.
Мөн нэг минутад хамгийн олон үг зөв уншсан болон хөрвүүлсэн гурван сурагчийг тусгайлан шалгаруулж, урамшуулжээ.
Үндэсний бичгийн хэрэглээг сурагчдын дунд нэмэгдүүлэх, мэдлэг, чадварыг нь ахиулах зорилгоор “Би үндэсний бичгээ мэднэ” уралдааныг цаашид өргөжүүлэн, тогтмол зохион байгуулах юм.
Эх хэлний өдөртэй холбоотой ажлыг энэ жил 10 дугаар сарын 1-ний өдөр хүртэл зохион байгуулахаар шийдвэрлэжээ.
