Монголын тайз, дэлгэцийн урлагт өөрийн өнгө төрх, уран бүтээлийн арга барилаараа танигдсан жүжигчин бол Монгол Улсын гавьяат жүжигчин Уртнасангийн Уранчимэг.
Өнөөдөр түүний төрсөн өдөр.
У.Уранчимэг найман хүүхэдтэй айлын дундах охин болон өсжээ. Тэрбээр жүжигчин болох хүсэл мөрөөдлөө багаасаа тээж, бүр гуравдугаар ангид байхдаа энэ мэргэжлийг сонгохоор шийдсэн гэдэг.
Тэрбээр 18 настайдаа Улсын драмын эрдмийн театрын босгыг алхаж, өдөр нь суралцаж, орой нь өлгүүрчнээр ажиллаж эхэлсэн гэдэг. Удалгүй дагалдан жүжигчнээр ажиллаж, Ардын жүжигчин Д.Мэндбаярын шавь болжээ. СУИС-д дөрвөн жил суралцсаныхнаа дараа тэрбээр театртаа мэргэжлийн жүжигчний хувиар эргэн ирсэн байна.
Түүний театрын тайзнаа бүтээсэн дүрүүдээс “Цахлай” жүжгийн Нина, “Далан худалч” жүжгийн Пагма, “Хар санаа ба хайр сэтгэл” жүжгийн Луйза, “Шөнө дундын бүжиг” жүжгийн Шубира, “Шөнө амталсан нулимс” жүжгийн Чимгээ зэрэг нь онцгой байр суурь эзэлдэг. Түүнийг зөвхөн нэг төрлийн дүрд баригддаггүй, сэтгэлзүйн өөр өөр өнгийг мэдрүүлж чаддаг жүжигчин болохыг харуулсан юм.
Дэлгэцийн уран бүтээлийн гараагаа тэрбээр 1993 онд “Бүсгүйн завилгаа” кинонд гол дүр бүтээснээр эхэлжээ.
Театрын уран бүтээлийнхээ зэрэгцээ тэрбээр “Хувьсал” продакшнаа толгойлж, “Зэрлэг цэцэгсийн хүлэмж”, “Зүрхээр наадагч”, “Тооцоогүй тоглоом”, “Атганд үлдсэн эрдэнэ”, “Миний нууц”, “Тэнгэрээс буусан од”, “Ноён эмэгтэй”, “Хувь заяа”, “Аминч”, “Сэтгэлийн уяа” зэрэг бүтээлүүдээр үзэгчидтэйгээ “уулзжээ”.
