Америкийн блюз хөгжмийн домог Бобби Раш 92 насандаа ч уран бүтээлээ идэвхтэй үргэлжлүүлж, өөрийн амьдрал, хөгжмийн өвийг өгүүлэх шинэ баримтат кино болон уран бүтээлүүдээ үзэгч, сонсогчдод хүргэж байна.
Нэшвилл дэх Африк-Америкийн хөгжмийн үндэсний музейд “People” сэтгүүлд ярилцлага өгөхдөө Раш блюзийн ертөнцөд өнгөрүүлсэн олон арван жилийн замналаа эргэн дурсжээ. Тэрбээр Бадди Гай, Чарли Масселуайт, Таж Махал, Кеб Мо зэрэг алдартай блюз хөгжимчдийн талаар ярихдаа нас, туршлагаа хошигнон онцолж, “Би энэ бүхний өвөө нь. Надтай харьцуулахад тэд бүгд хүүхдүүд” хэмээсэн байна.
Раш 1957 онд Бадди Гайтай танилцаж байсан бол Таж Махалыг олон арван жилийн турш мэддэг, Кеб Мотой 30 орчим жил нөхөрлөжээ. Мөн Чарли Масселуайттай хамт аялан тоглолт хийж байсан аж. Раш блюзийн домог B.B.King-тэй холбоотой сэтгэл хөдөлгөм дурсамжаасаа мөн хуваалцжээ.
Түүний амьдрал, уран бүтээлийн замналыг өгүүлэх “Bobby Rush: King of the Chitlin’ Circuit” баримтат кино 2026 оны наймдугаар сард “Mississippi Public Broadcasting” сувгаар нээлтээ хийсэн бөгөөд арваннэгдүгээр сарын 23-нд PBS-ээр АНУ даяар цацагдахаар болжээ.
Өдгөө 92 настай ч Раш шинэ уран бүтээлээсээ хөндийрөөгүй бөгөөд гитарчин Кенни Уэйн Шепердтэй хамт 15-16 орчим шинэ дуу бичүүлээд байгаа аж.
