“AUM” хэвлэлийн газраас Д.Гүнболдын “Аарууру” туужийг эрхлэн гаргаснаа уншигчдын гарт хүргэж буй. Уг номын ерөнхий редактороор Соёлын гавьяат зүтгэлтэн, зохиолч, яруу найрагч Г.Аюурзана ажиллаж, өмнөх үгийг нь бичжээ.
Тэгвэл Азийн тэргүүн яруу найрагч, зохиолч Д.Урианхай “Аарууру” туужийн талаарх сэтгэгдлээ нийтэлжээ.
Сэтгэгдлийг бүрэн эхээр нь хүргэе.
Энхрий хүмүүн, халамжит шавь маань шинэхэн номоо бариад ирлээ. Тун сонин түүх, содон бичсэн туужийг нь эрхэм Г.Аюурзана дүү минь ерөнхий редактор хийсэн билээ. Энд элдвийг хүүрнэхээс илүү эрхэм та нартаа сэтгэлээ дэлгэж, “аарууру”-д орсон үгээ дуулгая!
Хүн төрөлхтөн өнөөдөр “шуудайнд чихсэн үхрийн эвэр” шиг амьдарч байна. Улс үндэстнүүд бие биедээ итгэх итгэл, бие биедээ ханьсан нөхөрлөх сэтгэл, хүн төрөлхтний өнөөгийн нийгмийн гажуудмал харилцааны “хар нүх”-энд сорогдон мэдээ, чимээ тасарч хүн төрөлхтөн бидэнд “хүн” байгал-нийгмийн “амьтан”-ынхаа ижилслийн “татах хүч”-ээр адилсах, ах дүүсэх найдвар “утопи мөрөөдөл” болж хувирсан харамсалтай үйл явц жилээс жилд асар хурдтай эрчимжсээр дэлхийг хамлаа.
Хүний мөн чанарын үнэнүүд дотор нэг айхтар бат бөх үндэстэй үнэн нь “үнэнээ нуудаг” чанар боловч хүн төрөлхтний түүхийг ноцтой харлуулж буй хүмүүс хоорондын харилцааны хүйтрэл, зөрчил, үл ойлголцол, дайсагнацал, бие биеийнхээ эгээрэл, зорилгыг хүний хэлээр бус “хүчний хэл”-ээр ойлгуулах хандлагын үнэн өнөөдөр “нуув ч нуруу нь ил, даравч дал нь ил” цухуйжээ.
Хүн төрөлхтөн бидний амьдрал дахь өөрсдөө бид тодорхой мэдрэхүй, сэтгэлгээнд маань өртөхгүй байгаа том эмгэнэл бол эв нэгдлийн найдвартай механизм олж чадахгүй амьдарч байгаа явдал юм.
Уг нь хүн төрөлхтний эв нэгдлийн хамгийн бөх, хүчирхэг холбогч нь, хүмүүс хоорондын харилцаан дахь харьсал, холболт, гадуурхалт, өрсөлдөөн, үзэн ядалтын орон зайг туулж давах “гүүр” нь хүний “дотоод ертөнц”-ийн гэгээрэл, хайр, хүний сэтгэлд “өндөглөөстэй” байгаа бурханлаг энэрэхүй чанар юм. Д.Гүнболдын “Аарууру” туужийн утга агуулгын гол философи санаа хүмүүс хоорондын харилцааг төгс эерүүлэх нуугдмал, байгаллаг буюу анхдагч суурь үнэнийг ухаж гаргахад чиглэжээ. Бичлэгийн арга, сэтгэлгээ орчин үеийн, бас сонирхолтой сэдэв сонгосон нь энэ түүний онцлог юм.
