Холливудын жүжигчин Марк Руффало АНУ-ын Ерөнхийлөгч Дональд Трампт хандан ирэх сонгуульд сонгогчдын эрхэд халдахгүй байхыг анхааруулж, эс бөгөөс “Халк шиг уурлана” хэмээн хошигнон мэдэгджээ.
Руффало Нью-Йорк хотод өнгөрсөн ням гараг /2026.10.04/-ийн орой болсон “Hands Off Our Vote” арга хэмжээнд оролцож, арваннэгдүгээр сарын 3-нд болох завсрын сонгуулийн ач холбогдлын талаар үг хэлсэн байна. Тус арга хэмжээ нь сонгогчдыг сонгуульдаа идэвхтэй оролцохыг уриалах зорилготой бөгөөд жүжигчин Роберт Де Ниро, инээдмийн жүжигчин Мо Амер нар мөн оролцжээ.
Мөн тэрбээр сонгуулийн системийг хамгаалах чиглэлээр ажилладаг “Free Speech for People” байгууллагыг дэмжихийг иргэдэд уриалж, сонгуулийн үр дүнг дотоодын болон гадаадын аливаа хөндлөнгийн оролцооноос хамгаалах шаардлагатайг хэлсэн байна.
Руффало үгийнхээ төгсгөлд сонгогчдыг айж, дарамтад автахгүй байхыг уриалаад, эв нэгдэлтэй байж, сонгуульд заавал оролцох хэрэгтэйг онцолсон байна.
