“The Beatles” хамтлагийн домогт гишүүн Жон Ленноны хүү Шон Оно Леннон өөрөө болон эцэг нэгт ах Жулиан Леннон нарын эцгээсээ өвлөж авсан хөрөнгийн хэмжээний талаарх олон жилийн цуурхлыг няцаажээ.
Шон аравдугаар сарын 11-нд X нийгмийн сүлжээнд нэгэн хэрэглэгчийн нийтлэлд хариулахдаа “Жулиан бид хоёр ааваасаа ижил хэмжээний хөрөнгө өвлөж авсан. Бидний итгэлцлийн сангууд тэнцүү байсан. Түүнийх арай илүү байсан ч ялгаа нь өчүүхэн” хэмээн бичсэн байна.
Жон Леннон 1980 онд амиа алдсаны дараа түүний өв хөрөнгийн хуваарилалт олон нийтийн анхаарлыг татаж ирсэн юм. Жон Ленноны анхны эхнэр Синтиягаас төрсөн Жулиан Леннон болон хоёр дахь эхнэр Ёко Онотой дундаасаа төрсөн Шон Оно Леннон нарын өвлөсөн хөрөнгө харилцан адилгүй байсан гэх таамаг олон жилийн турш тархсаар иржээ.
Жулиан Леннон эцгийнхээ өв хөрөнгөтэй холбоотой маргаанд олон жилийн турш оролцсон бөгөөд 1996 онд Ёко Оногийн талтай тохиролцоонд хүрсэн байна. Гэвч өв хөрөнгийн хуваарилалтын санхүүгийн нарийн мэдээлэл нийтэд бүрэн ил болоогүй юм.
Шон, Жулиан нар ах дүүсийн хувьд дотно харилцаатай гэдгээ өмнө нь илэрхийлж байсан. Шон ах Жулианаа бага насандаа өөрийнх нь баатар байсан хэмээн дурсаж, гитар тоглож сурахад нь тусалж байсныг ярьжээ.
Мөн ах дүүс аравдугаар сарын 9-нд төрсөн өдрөө хамт тэмдэглэсэн байна. Шон хамт авахуулсан зургаа олон нийтийн сүлжээнд нийтэлж, ахтайгаа төрсөн өдрөө сайхан өнгөрүүлсэн тухайгаа хуваалцжээ.
Шоны мэдэгдэл нь Жон Ленноны хоёр хүүгийн өвлөсөн хөрөнгийн хэмжээний талаарх таамагт хариу өгсөн төдийгүй ах дүүсийн харилцааг дахин олон нийтийн анхааралд орууллаа.
