Монголын зурагт радиогийн түүх бичигдэж эхэлсэн он жилүүдээс хойш телевизийн урлагийн түүх монгол нүүдэлчдийн соёл иргэншил, сэтгэхүйн цар хүрээгээр хуудсаа зузаатгаж, дуу дүрсний гайхамшиг, мэдээ мэдээллийн хязгааргүй их уудамд нэвтрэн орсон 47 жилийн түүх өдгөө Монголын телевизийн урлагийн хөгжлийн түүх болсон байна.
Энэ олон жилийн түүхтэй ажилч, хөдөлмөрч хамтын олны дэргэдээс бий болсон MNB тэмүүлэл клубийн урилгаар Монголын Залуучуудын холбооны салбар салбарын залуус МҮОНРТ-ийн үйл ажиллагаатай танилцаж, нөхөрсөг уулзалт зохион байгууллаа. Энэхүү танилцах уулзалтанд оролцсон залуусыг МҮОНТ-ийн захирал Д.Энхтуяа, MNB тэмүүлэл клубийн тэргүүн н.Өлзий, MNB.mn сайтын ахлах редактор н.Болортулга тэргүүтэй тус байгууллагын хамт олон нөхөрсөгөөр хүлээн авч үйл ажиллагаагаа танилцуулсан юм. Энэ үеэр МҮОНРТ болон МЗХ цаашид хэрхэн хамтран ажиллаж болох тухай санал бодлоо солилцсон юм. Энэхүү уулзалтанд оролцсон МҮОНТ-ийн захирал Д.Энхтуяа: “МЗХ бол үзэл суртлын маш том зэвсэг. Телевиз ч бас олон нийтэд хүргэж буй нийтлэл нэвтүүлгийн бодлогынхоо хүрээгээр олон нийтийн сэтгэхүйд нөлөөлж чаддаг.
Энэ 2 том зэвсэг нийлээд нийгэмд ямар үлгэрлэл үзүүлж чадах вэ? гэдэг нь чухал юм. Тиймээс залуучуудаа уриалан дуудаж залуучуудаараа дамжуулж нийгэмд үр дүнтэй ямар ажлуудыг хийж болох вэ гэдгийг хамтын ажиллагаагаараа харуулах хэрэгтэй болов уу гэж бодож байна. Бид жижигхэн зүйлээс эхлээд түүнээсээ салаалан нийгэм рүү чиглэсэн, үр дүнд хүрсэн олон томоохон ажлуудыг эхлүүлж болох юм” гэдгийг онцлон хэлж байсан юм. МЗХ-ны төлөөлөгчид ч МҮОНРТ –тэй цаашид хэрхэн хамтран ажиллаж болох талаар өөр өөрсдийн санал бодлыг чөлөөтэй илэрхийлсэн юм. Үүний дараагаар цэнхэр дэлгэцийн ард өрнөх амьдралтай танилцаж, олны танил хөтлөгч, нэвтрүүлэгч, редакторуудтай биечлэн уулзаж нэг өдрийг дурсах дурсамж дүүрэн өнгөрүүллээ.
