Хонконгийн нэрт жүжигчин Чоу Юнь Фат 71 нас хүрсэн ч эрүүл, идэвхтэй амьдралын хэв маягаа хадгалж, өдөр бүр таван километр гүйдэг хэвээр байна. Тэрбээр энэхүү дадлаа бараг найман жилийн турш тасралтгүй хэрэгжүүлж байгаа тухай “The Straits Times” мэдээлжээ.
“Crouching Tiger, Hidden Dragon”, “Hard Boiled”, “A Better Tomorrow”, “Pirates of the Caribbean: At World’s End” зэрэг киноны дүрээрээ дэлхийд танигдсан жүжигчин нас ахих тусам биеийн эрүүл мэнддээ илүү анхаарах болсон байна.
Түүний өдөр тутмын дасгал хөдөлгөөний гол хэсэг нь гүйлт юм. Чоу Юнь Фат тогтмол гүйхээс гадна ууланд алхах, явган аялал хийх дуртай бөгөөд байгальд цагийг өнгөрүүлэхийг эрхэмлэдэг аж.
Жүжигчин 2023 онд 68 настай байхдаа анхны хагас марафондоо оролцож, 21.0975 километрийн зайг 2 цаг 27 минут 56 секундэд туулсан нь олны анхаарлыг татаж байв. Тэрбээр тухайн үедээ өдөр бүр 4-5 километр гүйдэг дадалтай гэдгээ хуваалцсан юм.
Чоу Юнь Фат зөвхөн жүжигчний авьяасаараа төдийгүй энгийн даруу амьдралын хэв маягаараа ч олны хүндлэлийг хүлээдэг. Түүнийг Хонконгийн гудамжаар энгийн хувцастай алхаж, нийтийн тээврээр зорчиж, ууланд гүйж яваа дүр зураг олонтаа тааралддаг байна.
