АНУ-ын “Sony Pictures Entertainment” кино студи энэ сарын 25-ны өдөр нээлтээ хийхээр төлөвлөгдөөд байсан инээдмийн уран сайхны “Ярилцлага” киног олон нийтэд гаргахгүй байхаар шийдвэрлэсэн тухайгаа албан ёсоор мэдэгдлээ. Тус киноны гол дүрд Сет Рожен, Жэймс Франко нарын жүжигчид тоглосон бөгөөд АНУ-ын Тагнуулын төв газраас Хойд Солонгосын удирдагч Ким Жон Уныг хөнөөх даалгавар авч ярилцлагын нэвтрүүлгийн продюссерийн дүрээр БНАСАУ-д нэвтэрч буйгаар киноны үйл явдал өрнөх аж.
Гэвч энэ киног Хойд Солонгосын тал “өдөөн хатгалаг” гэж үзэж буйгаа илэрхийлэхийн сацуу кино студийн дотоод сүлжээг хакердаж, сүрдүүлсэнээр АНУ-ын томоохон хэд хэдэн кино театрууд киног олон нийтэд гаргахгүй гэдгээ илэрхийлэх болжээ. Одоогоор Regal, AMC, Carmike зэрэг кино театрууд киног гаргахгүй гэдгээ мэдэгдээд байна.
Олон театрууд киног нь гаргахаас татгалзсанаар “Sony Pictures Entertainment” кино студи тус киног олон нийтэд гаргахыг хориглохоор шийдвэрлэсэн байна. “Энх тайвны хамгаалагчид” гэж өөрсдийгөө нэрлэсэн хакерууд “Ярилцлага” киноны тухайд 2001 оны есдүгээр сарын 11-ний террорист ажиллагааг иш татан, кино театрт очих тухай бодож байгаа хүмүүсийг “гашуун хувь тавилан” хүлээж байна гэх сүрдүүлсэн мэдэгдлийг гаргаад байсан юм.
Б.Даваа