Зарим бүсгүйчүүдийн хувьд тэгш гадаргуу бүхий замаар өндөр өсгийттэй явахад хэцүү байдаг. Тэгвэл Оросын нэгэн эмэгтэй циркчин олсон дээгүүр өндөр өсгийттэй явж, Гиннесийн амжилтыг шинэчлэн тогтоосон байна. Оксана Сероштан гэгч үзэсгэлэнт бүсгүй тэрхүү амжилтыг тогтоожээ.
Италийн телевизийн нэвтрүүлгээр гарсан уг эрсдэлтэй үзүүлбэрт богино банзал өмсч, тэнцвэрээ алдахгүй байх үүднээс нэг гартаа сэнс барьж, 15 метр урт олсон дээгүүр 10 см өндөр өсгийттэй ядах юмгүй алхаж чадсан байна. Ингэснээр хамгийн урт олсон дээгүүр өндөр өсгийттэй явсан хэмээн Гиннесийн номд бичигдсэн байна.
Өмнө нь энэхүү амжилтыг Австрали бүсгүй эзэмшиж байжээ. 2013 онд Челси МакГуффин гэгч бүсгүй 7.525 метр олсон дээгүүр явж, рекорд тогтоож байсан аж. Харин энэ удаа орос эмэгтэй түүний амжилтыг эвдсэн байна.
Эх сурвалж: www.mminfo.mn
