Супер баатруудын тухай “Marvel” комик номоос сэдэвлэн бүтээсэн “The Avengers” кино өнгөрөгч тавдугаар сард АНУ-д нээлтээ хийсэн эхний долоо хоногтоо орлогоороо дээд амжилт тогтоож, 200 сая ам.долларын орлого олж байсан билээ. Тэгвэл “Уолт Дисней” компани тус киноны дараагийн анги “The Avengers 2” киног хийхээр болжээ. “The Avengers” киноны зохиолыг продюссер, кино, телевизийн найруулагч, комик номын зохиолч Жосс Уидон бичиж, өөрөө найруулсан юм. Түүний энэ кино нь гайхамшигтай амжилт олсон учраас тэрбээр дахин “The Avengers 2” киноны зохиолыг бичиж, найруулахаар шийджээ. “The Avengers” киноны ачаар “Уолт Дисней” компанийн орлого 49 сая ам.доллараас 313 сая ам.доллар болж өссөн бөгөөд тус компанийн интернэтээс олсон орлого 24 хувиар нэмэгдэж, 1.8 тэрбум ам.долларт хүрчээ. Одоо хийгдэх гэж буй “The Avengers 2” кино нь ирэх 2013 онд дэлгэцнээ гарах бөгөөд мөн ирэх онд "Iron Man 3", "Thor: The Dark World" зэрэг супер баатруудын тухай өгүүлэх кинонуудтай зэрэгцэн үзэгчдийн хүртээл болох нь ээ.
Б.АНХТУЯА
