Улсын дуурь, бүжгийн эрдмийн театрын уран бүтээлчид өнгөрсөн хоёрдугаар сарын 18, 19-нд урлагийг дэмжигч “Төгөлдөр сан”-гийн ивээн тэтгэлгээр А.И.Хачатуряны алдарт “Спартак” балетыг сэргээн тавьсан. Тэгвэл энэ сарын 4-нд буюу ирэх ням гаригт дахин тоглох гэж байна. Уг балетын цомнолыг Рафаэлло Джовавелийн “Спартак” зохиолоос сэдэвлэн Н.Волков, А.И.Хачатурян 1954 онд хөгжмийг бичиж, балетмейстер Л.Якобсон Кировийн театрт 1956 оны арванхоёрдугаар сарын 27-нд анх дэглэн найруулан тавж байжээ.
А.И.Хачатурян уг “Спартак” балетын хөгжмийн зохиолоороо 1956 онд “Төрийн соёрхол” хүртэж байсан юм. Алдарт балетмейстер Юрий Григорович Москвагийн Их театрын тайзнаа 1968 онд шинээр дэглэн найруулж, ХХ зууны шилдэг балетуудын жагсаалтад “Спартак” балетыг оруулж чадсан юм.
