Францын нэрт дизайнер “Chanel” брэндийг үндэслэгч Коко Шанель 1883 оны 8-р сарын 19-ны өдөр мэндэлсэн юм. Тэрээр “Time” сэтгүүлийн “Зууны хамгийн чухал 100 эрхэм”-ийн нэгээр шалгарч байлаа. Тэгвэл энэ эрхэмсэг хатагтайн нэрээр нэрлэгдсэн “Chanel” брэнд 129 жилийн настай агаад өдгөө дэлхийн хамгийн алдартай брэнд болж чадсан юм.
Коко Шанель эмэгтэй хувцасны орчин үеийн дүр төрхийг гаргаж өгснөөрөө загварын түүхэнд нэрээ мөнхөлсөн нэгэн. Гэхдээ тэр дэлхий нийтийн эмэгтэйчүүдийн хувцсанд хувьсгал хийсэн цорын ганц хүн биш хэдий ч анхны алдартай дизайнер эмэгтэй юм. Түүний гайхамшигт оюун ухаанаас урган гарсан өвөрмөц дэгжин хувцас нь үе үеийн хүүхнүүдийн сэтгэлийг булаасаар өнөөг хүржээ. Коко Шанель өөрийнхөө тэмдэглэлд эмэгтэйчүүдэд сургамжтай маш олон зүйлийг бичиж үлдээсэн байдаг. Энэ бүхнээс жишээ болгон танд хүргэвэл:
• Царай муутай эмэгтэй гэж байдаггүй харин залхуу эмэгтэй л гэж байдаг.
• Ямар ч насны эмэгтэй хүн сайхан хувцасанд өөрийн эрхгүй татагддаг.
• Хээнцэр тансаг байдал гэдэг нь ядуурлыг үгүйсгэдэггүй, харин бүдүүлэг, боловсон бус байдлыг үгүйсгэдэг.
• Эмэгтэй хүн нүцгэн үедээ л хамгийн сайхан хувцсыг өмссөн байдаг.
• Загвар бол уран барилгатай адилхан. гэх мэт олон сайхан хэлц үгийг бичин үлдээсэн байна.
Энэхүү алдартай брэндийг үндэслэгч Коко Шанелийн бага насны түүхээс сөхвөл тэрээр баян айлд өсч өндийгөөгүй. Түүнийг хорвоод мэндлэх үед эцэг эх нь албан ёсоор гэр бүл болоогүй байжээ. Ээж нь эмнэлэгт угаагчаар ажилладаг байсан ба аав Алберт Шанель нь гудамжинд дотуур хувцас, ажилчидад зориулсан сүлжмэл сагс зардаг байсан аж.
Гэтэл Коко Шанелийг 11 настай байхад нь түүний ээж 31 насандаа мөгөөрсөн хоолойн үрэвслээр таалал төгсчээ. Энэ үеэс эхлэн Коко Шанелийн толгой дээр амьдралын бүхий л асуудал овоорч, тэрээр амьдралын төлөө чадах чинээгээрээ тэмцэж эхэлсэн юм.
