Манай улсад албан ёсны айлчлал хийж байгаа Бүгд найрамдах Литва улсын Гадаад хэргийн сайд Аста Скайсгирите Ляушкиенег БСШУ-ы дэд сайд Б.Ундармаа өчигдөр хүлээн авч уулзлаа. Засгийн газар хоорондын хэлэлцээрийн дагуу оюутан, багш, судлаач харилцан солилцох асуудлаар тэд санал бодлоо хуваалцсан юм.
Мөн соёлын салбарт идэвхтэй хамтран ажиллаж, Монголын урлагийнхныг Литвын тал хүлээн авахад бэлэн байгаагаа тус улсын сайд мэдэгдлээ. БНХАУ-д болж байгаа “Монголын соёлын өдрүүд”-ийн үеэр манай урлангийнхны тоглолтыг Бээжинд суугаа тус улсын Элчин сайд үзээд Монголын урлагийн тоглолтыг Литва улсад урьж тоглуулах саналтай байгаагаа Гадаад хэргийн сайддаа дуулгасан ажээ.
Дэд сайд Б.Ундармаа манай оронд айлчилж буй Кентийн Эрхэм дээд Хунтайж Майклтай уулзсан. Монгол Улсын бага, дунд боловсролын стандарт хөтөлбөрийг шинэчлэх талаар Кэмбрижийн их сургуулийн олон улсын шалгалтын төвтэй хамтран ажиллаж байгаа талаар танилцуулсан байна. Хунтайж Майкл өөрийн улсад мэргэжлийн англи хэлтэй боловсон хүчин сургахад туслах талаар ярилаа
