Хошин урлагийн “Өнгөт инээд” нэрээ өөрчлөн “Шилдэг өнгө” продакшн болгон уран бүтээлээ туурвих болсоор багагүй хугацаа өнгөрчээ.
Тэд тайзны уран бүтээл болох “Амьдрал өөрөө хичээл” нэртэй адал явдалт, уянгын жүжгийнхээ нээлтийг МҮЭСТО-нд саяхан хийсэн билээ. Жүжгийн зохиолыг тус продакшны захирал Ц.Хүсэлбаатар бичин найруулагчаар Соёлын тэргүүний ажилтан жүжигчин О.Бат-Өлзий ажиллаж, гол дүрүүдэд СУИС-ийг энэ жил жүжигчний мэргэжлээр төгсөж буй залуу уран бүтээлчид тоглосон аж.
Жүжигт сургуулиа төгсөж буй ангийн оюутнуудын амьдралыг харуулжээ. Удахгүй тус хамтлагийнхан нэгэн шинэ уран бүтээлийнхээ нээлтийг хийх юм байна. Хайрын түүхээр өрнөх сонирхолтой адал явдал бүхий “Дурлалын сум” кино нь өнөөдрөөс эхлэн кино театруудад гарч эхэлнэ.
Албан ёсны нээлтээ энэ сарын 25-нд “Тэнгис” кино театрт хийхээр болжээ. Энэхүү киноны гол дүрд Гавьяат жүжигчин Б.Туяа, “Мөрөөдлийн театр”-ын жүжигчин Г.Алтаншагай, “Маск” продакшны жүжигчин М.Баярмагнай, жүжигчин С.Өлзийхүү нар тогложээ.
