"Усны гудамж" хэмээх олон ангит киноны уран бүтээлчид хэвлэлийн бага хурал хийлээ. Энэхүү киноны продюсерээр бидний дунд "АХА" нэвтрүүлгийн санаачлагч гэдгээрээ танил болсон “Сэмүүн” студийн захирал Б.Баяр, зохиолчоор Д.Төрмөнх, ерөнхий найруулагчаар Н.Элдэв-Очир, нэгдүгээр найруулагчаар Ж.Отгонбаяр, зургийн даргаар Я.Болдбаатар, ерөнхий зураглаач О.Амарбаясгалан нар ажиллаж байгаа юм байна. Харин гол дүрүүдэд Төрийн шагналт Ц.Төмөрбаатар, СТА Ц.Эрдэнэбат, СТА А.Энхбаяр, Х.Санги-Очир, А.Адилцэцэг, Б.Баярсанаа нар тоглож буй аж. Мөн жүжигчин Г.Равдан, дуучин Д.Болд зэрэг олны танил эрхмүүд ч өөрийн нэрээр тоглож, кинон дахь амьд харьцааг холбосон хэсгүүдэд гарах гэнэ
Эдгээр уран бүтээлчид Монголын улс төр, нийгмийн амьдрал, түүхэн хүмүүсийн намтрыг ихээхэн судалж, монгол ахуйгаа түлхүү харуулахын зэрэгцээ өнөөгийн нийгэмд болж буй бүхий л үйл явдлыг холбон тусгахыг зорьжээ. Эхний таван ангийн зураг авалт хийгдэж дууссан бөгөөд Монголын нийгмийн амьдралыг тольдох таван өөр айлын нэгнийхэд нь гэхэд Төрийн соёрхолт, Ц.Төмөрбаатар тоглож, эхнэрт нь Дарханы жүжигчин бүсгүй, харин хүүд нь СУИС-ийн хоёрдугаар курсийн оюутан дүр бүтээжээ.
"25 дугаар суваг телевиз", "SBN", "MovieBox" телевизээр цацагдан үзэгчдийн хүртээл болох энэ киног эхний ээлжинд 30 анги хийхээр төлөвлөсөн байгаа ч цаашид Европын сериалууд шиг үргэлжлүүлэх зорилттой байгаагаа хэвлэлийн хурлын үеэр дуулгасан юм.
Та бүхнийг урлагийн тэнгэр ивээг…
www.URLAG.mn
