“Ертөнц” цомог “Hi-Fi Records”-ийн шилдэг борлуулалттай цомгийн жагсаалтыг 11 долоо хоногийн турш тэргүүлж, шилдэг цомгоор шалгарч, хөгжим сонирхогчдын дунд дөрвөн сарын турш “хит” байсаар байгаа. “Брос Рекордс”-ын тэнгэрийн өнгөтэй “Ертөнц” цомог тун удахгүй тайзан дээрээс эгшиглэх нь ээ.
Ирэх долдугаар сарын 5-аас наймдугаар сарын 19-нийг хүртэл Монголын Хүүхдийн ордны бэсрэг танхимд тоглогдох “Universe Live” тоглолтын бэлтгэл ажил хэдийнээ эхэлчихээд байгаа аж. Хэдийгээр тэд шилдэг хөгжимчдийн багийг бүрдүүлсэн ч бэлтгэл сургуулилалтдаа ач холбогдол өгөн зохион байгуулалт сайтай, чанартай тоглолт тавихаар ажиллаж байгаа гэсэн шүү.
Эх орныхоо аялал, жуулчлалын салбарт орчин үеийн урлагийн үндэсний брэнд бүтээж, хөгжүүлэх эрхэм зорилго өвөртөлж буй “Universe Live” тоглолтонд “Ертөнц” цомгоос гадна “Introduction to Nomads” цомгын“Бороо” бүтээл тоглогдох юм байна.
Уг тоглолтонд “Ертөнц” цомгийн хөгжмийн зохиолч Г.Онон даралтат хөгжим, товшуур, хэц, хэл хуурыг эгшиглүүлэх бол продюсер М.Болд ерөөл, товшуур тоглох бол “A Sound” хамтлагийн хөгжимчин Ц.Алтангэрэл буюу Атка гитар, хобис, Ю.Батпүрэв бөмбөр, Д.Мөнхболд басс гитар тоглох юм. Мөн “Бөртэ” хамтлагийн хөгжимчин Ч.Мөнх-Эрдэнэ ятга, хөгжимчин Ш.Баяржаргал даралтат хөгжим, Л.Саруулбат лимбэ, флейт тоглон “Ертөнц” цомгийг эгшиглүүлэх аж. Мэргэжлийн хөгжимчдийн ур чадвар, гэрэлтүүлгийн шийдэл, орчин үеийн хөгжмийн урлагийн түвшинг илэрхийлэхүйц жинхэнэ амьд хөгжмийн тоглолт бүтэн цаг үргэлжлэхээр төлөвлөгдсөн байгаа аж.
www.URLAG.mn
