Монгол уран нугараач шүдэн дээрээ хамгийн удаан жингээ авч тогтох үзүүлбэрээрээ дэлхийн гиннесийн амжилтыг шинэчлэн тогтоолоо. Түүнийг Э.Цацрал гэдэг бөгөөд өнгөрсөн долдугаар сарын 27-нд Туркийн Станбул хотод болсон гиннесийн дээд амжилтыг бүртгэх “Guinnes world records” нэвтрүүлэгт оролцон шүдэн дээрээ дөрвөн минут 17 секунд тогтож дэлхийн дээд амжилтыг шинэчлэн тогтоосон байна. Тэрээр урьд нь Унгарын Будапешт хотод болсон шалгаруулалтад оролцож хоёр минут 34 секундын амжилт тогтоож байсан юм. Энэ төрлөөр гиннесийн номд хоёр монгол эмэгтэй бүртгэгдсэн байдаг аж.
Э.Цацрал Италийн явуулын циркт хоёр жил ажиллаж байгаад гэрээний хугацаа дуусч, эх орондоо ирж байгаа бөгөөд Монголжингоо уран нугаралтын холбооноос дуучидтай хамтран, ирэх сарын дундуур зохион байгуулах амьд тоглолтод оролцохоор эх орондоо ирсэн байна. Энэ үеэр Монголжингоо уран нугаралтын холбооны гишүүн, уран нугаралтын багш Ц.Чандманьзаяа “Монгол улсынхаа нэрийг дэлхийн хэмжээнд гаргаж яваа энэ хүнийг төр засаг нь дэмжих хэрэгтэй. Мөнгө санхүүгийн тусламж үзүүлэхгүй юм гэхэд олон нийтэд ил тод болгох талаас нь анхаармаар байна. Бид холбогдох газруудад нь тусалж, дэмжүүлэх талаар хүсэлт хүргүүлсэн. Гэтэл өнөөдрийн байдлаар тодорхой хариу ирүүлээгүй байна” гэлээ.
www.URL:AG.mn
