Улсын Дуурь Бүжгийн Эрдмийн Театр нь 51 дэх улирлын тоглолтоо хөгжмийн зохиолч Төрийн соёрхолт, УГЗ Б.Шаравын “Чингис хаан” дууриар ирэх сарын 5-нд нээх гэж байна.
“Чингис хаан” дуурийг 2003 онд анх тайзнаа тоглож байжээ. Харин энэ удаад шинэ залуу гоцлол дуучдыг оролцуулж, хувцас хэрэглэлийг бүрэн шинэчилэн тоглох гэж байгаагаараа онцлогтой юм байна.
Энэ удаа МУГЖ Э.Амартүвшин, СТА Б.Эрдэнэтуяа, СТА М.Дариймаа, гоцлол дуучин Г.Шижирболд, Б.Энхнаран, дуучин С.Бат-Эрдэнэ нар анх удаа “Чингис хаан” дуурьт тоглох аж. Мөн УДБЭТ-ын гоцлол болон найрал дуучид, балетын жүжигчид бүгд оролцох юм байна.
Бага балчир насандаа өнчирч, бусдад басамжлагдан доромжлуулж, хэцүү бэрхийг үзсэн ч эх Өүлэний сургаал, өөрийн хатан зориг, мохошгүй тэмцэл, ухаанаараа Монгол Улсаа сэргээн мандуулсан суут жанжин, дэлхийг байлдан дагуулагч Чингис хааны тухай өгүүлэх энэ дуурийн цомнолыг ардын уран зохиолч П.Бадарч бичжээ.
УДБЭТ нь тус дуурийг Монголын сонгодог урлагийн үндэсний брэнд болгох зорилготой ажиллаж байгаа бөгөөд цаашид улсын хэмжээний баяр наадам, тусгаар тогтнолын өдрүүдээр тоглох юм байна.
Дашрамд дурдахад уран бүтээлчдийг амрах үеэр тус театрын балетын жүжигчин Ц.Хонгорзул, хөгжимчин Т.Энхболд, гэрэлтүүлэгч Л.Цагаанбанди нар ажил үйлстээ амжилт гаргаж СТА цол тэмдгээр шагнуулсан байна.
www.URLAG.mn
