Улсын дуурь, бүжгийн эрдмийн театр өнгөрсөн долоо хоногт 51 дэх улиралын нээлтээ “Чингис хаан” дууриар нээн үзэгчдээ хүлээн авсан юм. Тус театр гадны зочдоо хүлээн авч эхэлсэн бөгөөд өнгөрсөн баасан гаригт Эрхүү мужийн филармонийн 100 шахам уран бүтээлч зочлон гайхамшигт аялгуугаар нэгэн үдшийг хөглөн үзэгчдэд сонгодог урлагийн дээд ташаалыг мэдрүүлсэн билээ.
Тэгвэл дараагийн зочид нь “Оросын балетын одод” аж. Энэ сарын 19, 20-ны 17.00 цагт ДБЭТ-т тайзнаа бүжих “Оросын балетын одод”-ын тоглолтод ОХУ-ын Их театрын гоцлоочид ОХУ-ын гавьяат жүжигчин Анастасия Горячева, Андрей Болотин, Мариинскийн театрын гоцлооч ОХУ-ын Ардын жүжигчин Юлия Махалина, Михайловскийн театрын гоцлооч Михаил Венщиков, "Кремлевский балет" театрын гоцлоочид ОХУ-ын гавъяат жүжигчид Александра Тимфеева, Михаил Мартынюк, ОХУ-ын гавьяат жүжигчин Вера Арбузова зэрэг уран бүтээлчид иржээ. Мөн К.С.Станиславский, В.И.Немирович-Данченкогийн нэрэмжит хөгжмийн театр, Б.Я.Эйфманы нэрэмжит театр, Пермь хотын дуурь бүжгийн театрын бүжигчид, УДБЭТ-ын балетын гоцлоочид, нийт бүжигчид оролцон тоглох юм. Энэхүү арга хэмжээг ССАЖЯ, ОХУ-ын Соёлын яам, Монгол дахь ОХУ-ын ЭСЯ дэмжин ажиллаж байгаа.
Уг тоглолтын талаар УДБЭТ-ын ерөнхий захирал Ч.Мөнхзул хэлэхдээ: “Улсын дуурь бүжгийн эрдмийн театр түүхэн тавин жилийнхээ явцад дэлхийн сонгодог урлагийн 500 жилийн түүхийг довтлон туулж, дэлхийн түвшинд хүрч чадсан. Энэ амжилтанд ОХУ-ын балетын хөгжил ихээхэн нөлөөлсөн бөгөөд манай балетын бүжигчдийг бэлтгэхэд тусалж ирсэн ОХУ-ын балетын сургуулиуд, багш нарын өгүүлшгүй гавъяаг бид ямагт талархаж байдаг. Олон жилийн хамтын ажиллагааныхаа бахдам түүхийг батжуулан энэ жил бид тайзан дээрээ "Оросын балетын одод" тоглолтыг зохион байгуулж байгаадаа туйлын баяртай байна. Энэ тоглолтонд ОХУ-ын балетын нүүр царай болсон алдартнууд оролцож дэлхийн сонгодог болон өнөө цагийн өвөрмөц шилдэг бүтээлүүдийг тоглон монголын үзэгч олонд бэлэг барьж байна.
Монголын болон Оросын балетын уран бүтээлчид, мэргэжлийн театрууд хамтран ажиллаж олон сайхан төслүүд хэрэгжүүлнэ хэмээн итгэж байна. Манай үзэгчдийн хувьд танил биш шинэ орчин үеийн өвөрмөц бүжгийн хэсгүүд нэлээн байгаа. Энэ нь үзэгчдийн хувьд дэлхийн сонгодог урлагийг болон орчин цагийн Оросын балетын дэглэлтийн онцлог хоёрыг нийлүүлсэн өвөрмөц тоглолт болно” хэмээсэн юм.
“Оросын балетын одод” тоглолтод УДБЭТ-ийн Ч.Ганчимэг, Г.Батчимэг, Б.Саруул, Б.Энхтуул, О.Анужин, Б.Баасансүрэн, Б.Пүрэв-Очир, А.Билгүдээ нар хамтран тоглож байгаа ажээ.
www.URLAG.mn
