Монголын хүүхдийн ордны ардын хөгжмийн “Аялгуу” хамтлагийнхан маргааш Япон улсыг зорих гэж байна. Тэдний аялан тоглолт ирэх сарын 18-ныг хүртэл үргэлжилнэ. “Аялгуу” хамтлаг нь 1980 оноос Монголын хүүхдийн ордны Энхтуяа багшийн удирдлаган дор хичээллэж ирсэн юм.
Хамтлагийн урын санд өөрийн орны болон гадаадын орнуудын сонгодог бүтээл, олон орны дуу хөгжим, бүжгийн аялгуу, ардын болон зохиолын, хүүхдийн дуунууд зэрэг хөгжмийн төрөл бүрийн олон арван бүтээлүүд багтдаг. Хөгжимчид, дуучид нь өөрийн дугуйлангаас бэлтгэгддэгээс гадна хөөмийч, уран нугараач, бүжигчдийн уран бүтээл хамтлагийн урын санд багтдаг юм.
Тус хамтлагаас урлагийн авъяаслаг залуу хөгжимчид, хөгжмийн зохиолч, дуучид, хөгжмийн багш нар зэрэг мэргэжилтнүүд олон арваараа төрөн гарч байгаа нь Монголын хүүхдийн ордны ардын хөгжмийн “Аялгуу” хамтлагийн сургалтын үйл ажиллагааны үр дүн юм.
www.URLAG.mn
