Нээлтээсээ өмнө үзэгчдийн дунд шуугиан тариад амжсан кино

Жүжигчин, дуучин Эби, Амгаа, Пара, Боогий гээд дөрвөн авъяслаг залуус, анх УДЭТ-ын "Тайчигч хөвгүүд ба саарал гудамж", "Бооцоо" жүжигт тоглосон даруйдаа олны танил болсон гэдэг.

Түүнээс хойш тэднийг үзэгчид "Драмын дөрөв" гэж нэрлэх болсон юм. Жүжигчин С.Болд-Эрдэнэ хувьд 14 жил урлаг хэмээх том айлд уран бүтээлээ туурвисаар яваа. Энэ хугацаанд тэрбээр 60 гаруй жүжиг, 20-иод кинонд тоглосон байдаг. Жүжигчин залуу тайзны уран бүтээлийнхээ хажуугаар “Хайрлаагүй амь”, “Дэв”, “Эзэнгүй бөгж”, “Орхидос”, “Нар сарны зааг”, “Үл таних эмэгтэй” зэрэг дэлгэцийн бүтээлүүдээрээ өөрийгөө чадварлаг жүжигчин гэдгээ бататган харуулдаг цөөнхөн хэдэн жүжигчдийн нэг гэхэд уншигчид санал нийлэх биз ээ.

Түүний мөрөөдөл бол кино. Ганц сайхан кино хийх юм сан гэж мөрөөддөг болоод удаж байсан гэдэг. Тэрбээр “Сайн уран бүтээл хийхийн тулд удаан бодох төлөвлөх хэрэгтэй" хэмээн ярьж байсан удаатай. Тэгвэл СТА, Жүжигчин С.Болд-Эрдэнэ мөрөөдөлдөө хүрч “Хөлтрөг” нэртэй уран сайхны киноныхоо ерөнхий найруулагчаар нь ажиллаж байгаа юм.

Энэхүү кинонд Хүний үйлийн үр, эх үрийн хайр, энэрэлийг харуулах уг бүтээлийн зохиолыг түүний төрсөн эгч С.Болормаа бичсэн бөгөөд ерөнхий зураглаачаар “Logic Film” студийн зураглаач Э.Нэргүй ажиллажээ. Мөн дууны найруулгийн "Авиа" студи хамтран бүтээсэн аж.

Уг киноны гол дүрд Төрийн соёрхолт, гавьяат жүжигчин Ц.Төмөрбаатар, Гавьяат жүжигчин Ж.Оюундарь, Соёлын тэргүүний ажилтан Н.Ялалт, О.Долгор нар тогложээ. Мөн охин, хүү хоёр дүр бүтээсэн. Тэднийг Н.Ирмүүн, М.Бат-Эрдэнэ гэдэг. Уншигч та бүхэндээ тун удахгүй нээлтээ хийх киноны зураг авалтын үеийн зургаас зургаас хүргэе.

Д.Ана