СТА дуучин Хумбагарын Батмэнд уран бүтээлийн бие даасан гурав дахь тайлан тоглолт энэ сарын 14-нд болно. Эрхэм уран бүтээлч энэ удаагийн тоглолтоо “Уярч дуулж хамтдаа” хэмээн нэрийджээ. Тэрбээр тоглолтондоо “Яаж мартах вэ”, “Гүнжиймаа” “Сэвтээ нь үгүй сэтгэл” зэрэг дуунуудаа дуулахаас гадна дуучин Адарсүрэнгийн сор болсон бүтээлүүдээр таны сонорыг мялаах юм.
Сүүлийн үед ховордсон уянгын баргил буюу мэргэжлийнхэн дунд басс баритон гэж нэрлэх хоолойгоор дуулдаг түүний уран бүтээлийг үзэгч, сонгогчид таашаан хүлээн авдаг болоод багагүй хугацааг үджээ. Мөн тэрбээр дуулахаас гадна бөх тайлбарлаж бөх сонирхогч олны сонорыг баясгадаг билээ.
Түүний тоглолтод нутаг нэгт уран бүтээлч МУГЖ Х.Болормаа, МУГЖ Ж.Алтанцэцэг нараас гадна СТА Э.Төрмандах, “Хөсөгтөн” хамтлаг, Цэргийн дуу бүжгийн эрдмийн чуулга, Цэргийн дуу бүжгийн эрдмийн чуулгийн эстрад симфони найрал хөгжимчид уригдан оролцох юм.
www.URLAG.mn
