Дархан-Уул аймгийн Залуучууд театрын 37 дахь жилийн үзвэрийн нээлтийн ёслол, "Сарны тойрог" сонгодог бүтээлийн концерт 2013 оны 11- р сарын 01- ний 19.00 цагт тоглогдлоо. Нээлтийн арга хэмжээнд Дархан-Уул аймгийн ЗДТГ болон төрийн байгууллагын удирдлагууд, аж ахуйн нэгжийн дарга, эрхлэгч, тус хотноо үйл ажиллагаа явуулдаг ОХУ – ын консулын газрын ажилтнууд, ард иргэд үзэгчдэд олноор ирсэн нь тус арга хэмжээний ач холбогдолыг өндөрсгөж байлаа. Театрын хамт олноос өнгөрсөн хугацааны үзвэрийн жилд хийсэн ажлын тайлангаараа үзэсгэлэн гаргаж мөн үзэгчиддээ хүндэтгэл үзүүлж баярын торт, халуун виногоор дайлсан нь энэ үдшийн гол сюрприз болсон юм.
Нээлтийн арга хэмжээнд хүндэт зочноор оролцсон Монгол улсын төрийн шагналт, ардын уран зохиолч Б.Лхагвасүрэн хэлэхдээ театр үүдний танхимаасаа эхэлдэг юм. Энэ мөчид Дарханы театрт үзвэрийн жилийн нээлтээрээ үзэгчид олондоо хүндэтгэл үзүүлж байгаа нь бахархууштай сайхан санагдаж байна гэж онцлоод энэ удаагийн үзвэрийн жилийн нээлтийн хөтөлбөрт өөрийнх нь бүтээсэн "Маргаашгүй хаан" түүхэн эмгэнэлт драмын жүжиг тоглогдох болсонд талархаж байгаагаа дуулгалаа. Тус арга хэмжээг тохиолдуулан театрын захиргаа, уран сайхны зөвлөлөөс өнгөрсөн жилийн хугацаанд үр бүтээлтэй ажилласан олон уран бүтээлчдээ шагнаж урамшуулсаны дараа театрын их танхимд "Сарны тойрог" сонгодог бүтээлийн тоглолт үргэлжилж үзэгчид халуун алга ташилтыг харамгүй хайрласан нь театр үзэгч хоёрын амьд харьцаа байлаа.
www.URLAG.mn