Лукасфилм, Дисней студиэс “Оддын дайн” киноны 7-р хэсэг 2015 оны 9 дүгээр сарын 18-нд нээлтээ хийхийг зарлалаа.
Дисней студийн захирал Алан Хорн “Та бүхэндээ киноныхоо нээлтийг зарлаж байгаадаа маш их баяртай байна. Бид маш гайхалтай, содон кино хийх болно” хэмээн ярьжээ . Харин киноны зураг авалтаа энэ хавар Лондонд эхлэхээр төлөвлөөд байгаа аж. Мөн ганц 7-р хэсэг биш 8, 9-р хэсгийг ч шуурхай хийхээр төлөвлөөд байгаа юм байна.
Шинжлэх ухаан, уран зөгнөлт кинон дээр дагнан ажилладаг найруулагч Ж.Ж.Абрамс 2015 онд нээлтээ хийх “Оддын дайн” цувралын долдугаар ангийг найруулахаар болжээ. Мөн киноны зохиолыг “Оскар”-ын шагналт зохиолч Майкл Арнд бичиж байгаа гэнэ. Киног бүтээж буй продакшныхан найруулагчаа олоход амаргүй байсныг нуугаагүй юм.
“Дисней” компанийн удирдлагууд Стивен Спилберг, Бред Бирд зэрэг алдарт найруулагчид санал тавьсан ч ажиллахаас татгалзсан хариу өгчээ. Эцэст нь Ж.Ж.Абрамст санал тавихад хүлээж авсан байна. “Лукас фильм” компанийн ерөнхийлөгч асан Кэтлин Кеннеди “Энэ бүтээлийг Абрамс найруулах болсонд баяртай байна. Тэр бол сайн найруулагч. Түүнд “Оддын дайн” киноны шинэ ангийг найруулах авьяас чадвар хангалттай бий гэдэгт итгэж байна” хэмээжээ. Харин Ж.Ж.Абрамс “Ж.Лукас бол миний баатар. Түүний найруулсан киног бага байхаасаа л үздэг байсан. Ийм алдартай хүний найруулсан киноны дараагийн ангийг бүтээнэ гэдэг миний хувьд бахархал” хэмээсэн юм. Дашрамд сонирхуулахад, “Лукас фильм” “Оддын дайн” киноны хоёр, гуравдугаар цувралыг 3D-гээр хүргэхээр ажиллаж байгаа аж.
www.URLAG.mn