Төрийн шагналт, яруу найрагч Р.Чойном агсан 1975 онд хүүхдэд зориулан “Чин зоригийн дууль” нэртэй бүжгэн жүжгийн цомнол бичжээ. Гэвч түүний урын санд нэр нь л хадгалагдах энэ бүтээлийн эхийг олж чадалгүй 2011 оныг хүрсэн гэнэ. Олон хүний гар дамжин явсаар хоёр жилийн өмнө Төрийн шагналт, хөгжмийн зохиолч С.Соронзонболдын гарт бүжгэн жүжгийн цомнол нь ирж, тэрбээр хөгжим бичин, тайзны бүтээл болгохоор шийджээ.
Тэрбээр Р.Чойномын өвийг хамгаалдаг “Өд” сангийн тэргүүн Д.Ганболдтой хамтран санхүүжилт хайж байгаа юм билээ. Бүжгэн жүжиг харьцангуй өндөр үнээр бүтдэг учраас ССАЖЯ, бусад төрийн болон төрийн бус байгууллагаас дэмжлэг хүлээсээр байгаа гэнэ. Энэ бүтээл нь хүүхдэд байгаль, дэлхийгээ хамгаалж хайрлах ухааныг ойлгуулсан нэлээд гүн агуулгатай аж.
“40-өөд жилийн өмнө Р.Чойном ирээдүйг харсан чухал нөлөөтэй зохиол бичсэн учраас өнөөдөр ч үнэ цэнэ нь алдагдахгүй” хэмээн “Өд” сангийн тэргүүн Д.Ганболд онцолсон байна.
www.URLAG.mn
