Их Британийн домогт дуучин Элтон Жон нөхөр Дэвид Фернишийн хамт “Elton John Zero Blanc de Blancs” нэртэй согтууруулах ундаагүй оргилуун дарсаа АНУ-ын зах зээлд танилцуулж байна. Тэд баяр ёслол, тэмдэглэлт мөчүүдэд архи, согтууруулах ундаа хэрэглэдэггүй хүмүүс ч бусадтай адил хундага өргөж, баяр хөөрийг хамтдаа мэдрэх боломжтой бүтээгдэхүүн бүтээхийг зорьжээ.
“Элтон Жон Zero” брэндийн анхны бүтээгдэхүүн болох “Blanc de Blancs” нь 2026 оны эхээр Их Британид худалдаанд гарсан бөгөөд энэ удаа АНУ-ын хэрэглэгчдэд хүрч байгаа аж. Уг бүтээгдэхүүнийг Италийн хойд бүс нутагт ургуулсан Шардоннай усан үзмээр хийдэг бөгөөд алим, цитрусын цэцэг, балжингарам цэцгийн анхилуун үнэр, эрдэслаг амт бүхий зөөлөн төгсгөлтэй гэж танилцуулжээ.
Тус оргилуун ундааны онцлог нь уламжлалт дарс үйлдвэрлэсний дараа спиртийг нь салгаж авдаггүйд оршино. Харин тусгай исгэх аргаар үйлдвэрлэхдээ эхнээс нь согтууруулах ундаа үүсгэхгүйгээр амт, бүтэц, үнэрийг нь бий болгодог байна. Ингэснээр уламжлалт оргилуун дарсны баярын уур амьсгал, тансаг мэдрэмжийг хадгалахыг зорьжээ.
Элтон Жон 1990 онд архи, согтууруулах ундаанаас бүрэн татгалзсан бол Дэвид Ферниш 2014 онд архи хэрэглэхээ больжээ.
“Elton John Zero” брэнд Их Британид богино хугацаанд амжилт олж, “Tesco” болон “Sainsbury’s” сүлжээ дэлгүүрүүдийн дээд зэрэглэлийн согтууруулах ундаагүй оргилуун дарсны ангилалд тэргүүлэх бүтээгдэхүүнүүдийн нэг болсон байна. Мөн 15 гаруй улсын зах зээлд худалдаалагдаж байгаа аж. АНУ-д сонгогдсон худалдааны цэгүүд болон цахим худалдаагаар худалдан авах боломжтой болжээ.
