Саяхан манай оронд Буриадын дуурийн театрын уран бүтээлчид тоглолтоо хийгээд буцсан. Тэгвэл энэ удаа манай уран бүтээлчид Буриад улсыг зорихоор болжээ. “Sweetymotion” хамтлагийнхан арван нэгдүгээр сарын 18-нд ОХУ-ын Улаан-Үд хотын Н.Бестужевийн нэрэмжит драмын театрт өөрсдийн бие даасан тоглолтоо хийх юм. “Sweetymotion” хамтлагийнхан өөрсдийн фейс бүүк хуудсандаа “Буриад улсыг зорих болсондоо баяртай байна.Та бүхэнтэйгээ уулзах мөчийг тэсэн ядан хүлээж байна” хэмээн Оросоор бичсэн байлаа. Тэдний тоглолтыг хөгжмийн зохиолч төгөлдөр хуурч Б.Чинбат хөтлөх юм
Буриадын хэвлэлээр “Монголын супер хамтлаг хөгжмийн зохиолч Чинбаагийн хамт ирнэ. Энэ хамтлаг Монголд анх удаа англиар “Why” нэртэй цомог гаргаж байсан. Тэд Япон, Хятад, Өмнөд Солонгос, Америкт амжилттай тоглож байлаа. “Sweetymotion” 2001 онд Буриадын “Цагаан сар” уралдаанд түрүүлэн, гран при шагнал хүртэж байсан юм. Чинбаа бол Америкт дэлхийн хэмжээний ододтой хамтран тоглож байсан хүн. “Чингис хаан” киноны хөгжмийг бичсэн алдартай хөгжмийн зохиолч” хэмээн бичсэн байна. Тус хамтлагийнхан тэнд тоглолт хийхээс гадна 11 дүгээр сарын 19-нд Барууны болон Монголын хөгжмийн талаар лекц уншиж, хичээл заах аж.
www.URLAG.mn