11 дүгээр сарыг уран бүтээлийн идэвхитэй сар гэж тодорхойлмоор байгаа юм. Учир нь, рок попынхон шинэ содон тоглолтоо үзэгч түмэндээ өргөн барьсаар байна. Энэ сарыг эхлүүлсэн эхний томоохон тоглолт гитарчин Д.Өлзий-Оршихын “Best of Өөжгий” бие даасан тоглолт байсан бол залгуулан МУУГЗ, хөгжмийн зохиолч Л.Балхжав “Миний дуунууд-2013” уран бүтээлийн 15 дахь бие даасан тоглолтоо гурав хоногийн турш зохион байгуулж, монгол түмнийг дуу хуураар бялуурууллаа.
Сонирхолтой нь, энэ жил бараг бүх л хамтлагийн ойн баяр тохиож байгаа бололтой. Уржигдар гэхэд л “Madness” хамтлаг 15 жилийн ойн тоглолтоо “UB PALACE” дүүрэн үзэгчтэйгээр зохион байгуулав. Мөн залуу уран бүтээлчдээс реппер Rokit Bay, дуучин A COOL нар хүртэл тоглоод амжжээ. Үүнээс харахад, рок попынхон зүгээр суугаагүй гэдгээ батлах бол үзэгчид ажил, амьдралын стрессээ тайлах боломж, сонголтуудаар дүүрэн ажээ.
Харин одоо биднийг “Хурд” хамтлагийн түүхт 20 жилийн ойн тоглолт, “Киви” хамтлагийн 9 жилийн ойн тоглолт араас нь клип бүтээгчдийн их наадам “UBS MUSIC VIDEO AWARDS-2013” наадам хүлээж байна.
Тус тоглолтууд гурвуулаа энэ сарын 29-нд болох бөгөөд цаг нь хүртэл давхацжээ. Тиймээс алиныг нь үзэх вэ гэдэг асуулт, эргэлзээ гарах шиг.
“Хурд” хамтлагийн тоглолтын хувьд мөн л хоёр өдөр үргэлжлэх бөгөөд галзуу улаан фенүүд нь очихоо мартаагүй биз. Харин “Киви”-гийн 9 жилийн ойн тоглолт, хос цомгийн баяр “BLUE SKY” цамхагийн “Вегас” клубт ганцхан удаа болно гэсэн. Мэдээж ойрд тайзнаас хараагүй “Киви”-чүүдийн дууг сонсох гэсэн охид, залуус бөөн бөөнөөрөө очих нь гарцаагүй ээ.
Харин клип бүтээгчдийн оны шилдгийг тодруулах “UBS MUSIC VIDEO AWARDS” наадам зохиогдоогүй багагүй удсан тул хөгжим сонирхогчид наадмыг хуруу даран хүлээж, анхаарлаа хандуулах болжээ.
“UBS MUSIC VIDEO AWARDS-2013” наадмаар рок поп хөгжмийн үе үеийн шилдгүүд, монголын клип бүтээгчид ер нь урлагийн салбарын олон нууцлаг хүмүүс нэгэн дээвэр дор чуулна гэсэн шүү. Тэд энэ жилийн клипний шилдгүүдийг ёслол төгөлдөр тодруулах юм. Шагнал гардуулах ёслолын ажиллагаа 11 дүгээр сарын 29-ний 16 цагт улаан хивсний ёслолоор эхлэх бөгөөд хамтлаг, дуучдын зөвхөн энэ наадамд бэлдсэн буюу хаана ч, хэний ч өмнө тоглогдоогүй шинэлэг тоглолтууд үзэгчдийн хүртээл болохоороо бусдаас онцлог болох шинжтэй. Рок попын их айл бүхлээрээ цуглах ховорхон үдэшт уншигч та ч хүндэтгэлтэйгээр саатах боломжтой юм байна.