"Монгол Бадарчин" төсөлийг Амай нэрээр алдаршсан DJ, аялагч Д.Золбаяр 2005 оны арваннэгдүгээр сарын 4-нд эхэлсэн. Одоогийн байдлаар 2000 гаруй өдөрийг хүний нутагт судалгаа хийж өнгөрөөн гурван боть номоо олон нийтэд хүргээд байгаа юм. Харин тэрбээр энэ удаад энэ сарын 26 буюу “Улс тунхагласны баяр”-аар Баянгол зочид буудлын зааланд дөрөв дэх боть болох "Дэлхийн Нэг Өдөр" номоо албан ёсоор танилцуулахаар болжээ.
тэрбээр “Байгалийн гайхамшигт үзэгдлүүд, хүн төрөлхтний 76 улс үндэстний ХХI-р зууны эхэн үеийн амьдрал, соёл, шашиныг харуулсан фото ном олон үед үнэ цэнэ, ач холбогдлоо алдахгүй гэдэгт итгэлтэй байна. Цаг агаарын болон цаг хугацааны нөлөөнд өөрчлөгдөх энэ үеийн амьдралын талаар үзүүлэх фото зургийн альбом маань хойч үед үлдээж, Монгол хүний нүдээр дэлхийг харуулсан ном гадаадын уншигчдын хүртээл болно гэдэгт эргэлзэхгүй байна” хэмээн шинэ номынхоо тухай бичжээ.
"Дэлхийн нэг өдөр" ном нь түүний аяллын туршид цуглуулсан бүх зургуудаас шилж, сэдэв сэдвээр нь ангилсан олон зуун сонирхолтой зурагтай, гайхамшигтай альбом болж байгаа гэнэ. Мөн хуудас эргүүлэх төдийн өөр өөр соёл иргэншилтэй танилцах, суралцах, сайхан зураг үзэж таашаал авах бүтээл болсныг онцолсон юм.
Тэрбээр олон нийтэд уг шинэ номоо хүргэхээсээ өмнө түүний уран бүтээлийг хүндэлдэг, цуглуулдаг, аяллын хамгийн сонирхолтой түүхүүдээс биечлэн сонсох хүсэлтэй байгаа дотны хүмүүстээ зориулаад энэхүү уулзалтыг зохион байгуулахаар, урилга илгээж байгаа аж.
Уг уулзалтанд ирсэн хэн бүхэн зохиогчоор нь шинэ номыг тайлбарлуулж, хамгийн сонирхолтой адал явдлуудыг нь сонсох нь ээ. Уулзалтын тасалбар 20 мянган төгрөг байх бөгөөд үүнд нэг ном багтжээ
www.URLAG.mn