Одоо ч их хотын залуус зөвхөн “Баасан ахын төрсөн өдөр” гэлтгүй өдөр болгон шоуддаг болсон. Тэгэхгүй гээд яалтай ч билээ дээ яг үнэндээ залуусын чөлөөт цагаа өнгөрүүлдэг газар хэд байгаа билээ дээ. Манайхан ч тэгээд гадаад нэр томьёонд дуртай гэж жигтэйхэн. Энэ ч парти, тэр ч парти гэнэ.
Тэгвэл яруу найраг, жааз хөгжим сонирхдог залууст нэг баяртай мэдээ дуулгахад энэ сарын 24-ний ням гарагт “Яруу найргийн жааз үдэш” болох гэж байна. Энэхүү арга хэмжээг Утга зохиолын "Шинэ үнэр" бүлгэм, “Их талын жааз” ТББ, Монголын Үндэсний Эх орон телевиз хамтран зохион байгуулах юм.
Их хотын хэмнэл амьдралыг урлагаар төсөөлбөл тэр нь гарцаагүй жааз хөгжим, Нэн шинэ шинэ үеийн яруу найраг байх ёстой гэж үзсэн учраас энэ үдшийг яруу найраг, жааз хөгжим сонирхогчдод зориулж санаачилсан билээ. Энэ өдөр хүрэлцэн ирсэн хүн бүр жааз хөгжим, яруу найргийн нууцлаг увидасыг мэдрэх болно гэдгийг зохион байгуулагчдын зүгээс амалж байна.
Онцолж хэлэхэд энэ үдэш унших бүх шүлэг жааз хөгжимтэй хорших аж. Үдэшлэгийн хөгжим, дуугаралтыг мэргэжлийн хөгжимчид эгшиглүүлж, Kush and Ouyka, дуучин Э.Оюундарь, “Оршихуй” хамтлаг уран бүтээлээ хүргэх юм байна.
Мөн МЗЭ-ийн ТУЗ-ийн дарга зохиолч Ц.Буянзаяа, СГЗ, яруу найрагч Г.Аюурзана, “Болор цом” яруу наадмын тэргүүн шагналт, модернист Б.Галсансүх, 1990-ээд оны Монголын утга зохиолын төлөөлөл гэгддэг “Хүрээ хөвгүүд” бүлгэм оролцох аж.
Энэхүү үйл ажиллагаа нь "Шинэ үнэр" бүлгэмийн дөрвөн жилийн ойн төрсөн өдрийн хүрээнд зохиогдож буйгаараа онцлог юм. Тасалбарын үнэ 5000 төгрөг. Суудлын тоо хязгаартай гэсэн шүү.
Т.Жанерке
