Эх орондоо төдийгүй дэлхий даяар алдаршиж буй цөөхөн эрэгтэй уран нугараачдын нэг Монгол Улсын циркийн жүжигчин МУСТА Э.Лхагва-Очир ирэх 12-р сарын 1-нд Улсын циркийн тайзнаа "ГАЛЫН ДОМОГ" нэртэй театрчилсан цирк шоугаа толилуулахаар товоо зарлаад байгаа билээ.
Монголын циркийн урлагийн нэрийг дэлхийд тунхаглах эрхэм зорилгыг өвөртлөн яваа авъяаслаг залуу уран бүтээлч маань тоглолтынхоо найруулгыг монгол ахуйгаар зохиомжлон тавьж буйгаараа онцлог аж. Тэрээр “Алтан ургийн хөх толбот үрс, Чингисийн удам” гэдгээ тодотгохыг хичээж, цаг ямагт уран бүтээлээ туурвидаг түүний анхны уран бүтээлийн тоглолтонд Канад улсад төвтэй дэлхийн алдартай явуулын цирк “CIRQUE DU SOLEOL”-ын жүжигчин МУСТА Э.Баасансүрэн урилгаар оролцохоор болжээ.
МУСТА Э.Баасансүрэн нь 4-н жилийн тэртээгээс “CIRQUE DU SOLEOL”-нд урилгаар ажиллаж эхэлсэн бөгөөд, өдгөө тус театрын дэлхийг тойрон тоглож буй, шинэ уран бүтээл “MICHAEL JACKSON” цирк шоунд урилгаар оролцож эх орныхоо нэрийг дэлхийд гаргаж яваа монголын циркийн урлагийн нүүр царай болсон авъяаслаг уран бүтээлч юм.
Ийнхүү монголд анх удаа тоглогдож буй "ГАЛЫН ДОМОГ" театрчилсан цирк шоу нь "Бөртэ чоно, Гуа марал"-ын түүхийг өгүүлэх бөгөөд шоуны зохиолыг “Болор цом”-ын эзэн, яруу найрагч Ц.Хулан бичсэн аж. Ингээд монголд шинээр хөгжиж буй этник урсгалыг шингээсэн, драмчилсан тоглолтоороо биер өгүүлэхүйн гайхамшигийг мэдрүүлэх авъяаслаг уран бүтээлчдээ талархал дэвшүүлж, түүний тоглолтыг үзэж сонирхохыг урьж байна.
Сонирхуулахад: эрхэм уран бүтээлчийн албан ёсны "Facebook" хуудсаар ЭНД дарж зочлон түүний ертөнцөөр аялаарай.
Таныг урлагийн тэнгэр ивээг…
www.URLAG.mn
