Улсын филармонийн Морин хуурын чуулгынхан Япон улсад аялан тоглолт хийгээд ирлээ. Тэд Япон улс дахь манай улсын өргөмжит консул Сато Норикогийн урилгаар энэ сарын 13-25-нд Токио, Осака, Шига, Окаяами хотод шилмэл бүтээлийн тоглолтоо сонирхуулжээ.
Морин хуурын чуулгынхан тус улсад 16 дахь жилдээ тоглолтоо хийсэн ч 2007 оноос хойш анх удаа бүрэн бүрэлдэхүүнээрээ явсан нь энэ аж.
“Япончууд морин хуур хөгжмийг сонирхон сонсож, бас олон хүн хөгжимдөж сурч байна. Сарын өмнө япон морин хуурчдын уралдаан болсон. Энэ удаагийн тоглолтыг манай Морин хуурын чуулгын байнгын болон шинэхэн үзэгчид олноор ирж сонирхлоо” гэж тус чуулгын менежер, морин хуурч Ж.Уугантуяа ярилаа.
Аялан тоглолтод морин хуурчдаас гадна Ардын жүжигчин, дуучин А.Долгор, Ш.Чимэдцэеэ нар оролцжээ.
Э.Оргил