МУИС-ийн Гадаад хэл, соёлын сургуулийн Түрэг судлалын тэнхимийн санаачилгаар Бүгд Найрамдах Турк Улсаас Монгол Улсад суугаа Элчин сайдын яамны дэмжлэгтэйгээр зохион байгуулж буй Руни бичгийг тайлж уншсаны 120 жилийн ойд зориулсан “Түрэг хэлний өдөрлөгийн нээлт өчигдөр боллоо.
Энэ арга хэмжээний хүрээнд Монголын Үндэсний түүхийн музейд “Түрэг судлал” сэдэвт үзэсгэлэнг дэлгэсэн бөгөөд нээлтийн ёслолд МУИС-ийн ректор А.Галтбаяр, БНТУ-аас Монгол Улсад суугаа Онц бөгөөд Бүрэн эрхт Элчин сайд Мурат Карагөз нарын албаны хүмүүс оролцжээ. Оюутан залууст турк хэл, Туркийн утга зохиол, соёл урлаг, түүх болон ёс заншлыг танилцуулах зорилго бүхий энэхүү арга хэмжээ таван өдөр үргэлжилнэ.
Монголын үндэсний түүхийн музейд өнөөдөр “Турк кино өдөрлөг” болох юм байна.
Харин маргааш МУИС-ийн хичээлийн хоёрдугаар байранд “Турк соёлын өдөр” арга хэмжээг зохион байгуулах гэнэ. Энэ үеэр Турк үндэстний идээ ундаа, үндэсний хувцас, гар урлалын бүтээгдэхүүнийг сонирхуулах гэнэ.
Ирэх баасан гаригт МУИС-ийн хичээлийн нэгдүгээр байрны дугуй танхимд “Түрэг судлал” сэдэвт оюутны эрдэм шинжилгээний хурал зохион байгуулах бөгөөд мөн өдрийн үдээс хойш БНТУ-ын Элчин сайдын өргөөнд хаалтын үйл ажиллагаа болох юм байна.
Э.Оргил
