Нийгмийн ардчилал Монголын залуучуудын холбоо /НАМЗХ/-ноос жил бүр зохион байгуулдаг “Алтан сарнай 2013” наадам энэ сарын 30-нд шилдгүүдээ тодруулахаар болжээ..
Тус наадам нийт 6 номинацид оны шилдгүүдийг тодруулах юм. Энэ сарын 26-29-ний хооронд нийт нэр дэвшигчдээс номинаци тус бүрт шилдэг 3 нэр дэвшигчийг дийлэнх олонхийн саналаар шалгаруулна. Мөн энэ сарын 31-нд номинаци тус бүр дээр шилдэг нэг буюу "Алтан сарнай"-н эздийг тодруулах юм байна.
14 дэх жилийнхээ онцлох хүмүүсийг шалгаруулж буй тус наадам монгол хүний үнэ цэнэ, эх орныхоо нэрийг өргөн, салбартаа амжилт гаргаж буй шилдгүүдийг олон нийтийн нээлттэй санал асуулгаар шалгаруулдаг гэдгээрээ онцлогтой. Наадмын шилдгүүдийг шалгаруулахдаа Фэйсбүүк хуудас болон altansarnai.mn цахим хуудсаар санал авах аж.
"АЛТАН САРНАЙ" оны тэргүүн наадмын дараах номинацид өөрийн дэмжиж буй хэдэн ч хүнийг нэр дэвшүүлэх боломжтой. Үүнд,
– Спортын салбар
– Шинжлэх ухаан, Техникийн салбар
– Хүмүүнлэгийн салбар
– Бизнесийн салбар
– Нийгэм, улс төрийн салбар
– Дэлхийн монгол хүн гэсэн номинац багтжээ.
