Сүүлийн жилүүдэд дэлхийн алдартай кино компаниуд өөрсдийнхөө бүтээсэн алдартай кино бүтээлүүдээрээ кино парк нээх болсон. Дисней болон Юниверсал кино компаниудын хувьд хэд хэдэн парктай юм.
Харин “ХХ зуун Фокс” кино компанийн хувьд өмнө нь ямар нэгэн кино парк нээж байгаагүй. Тэгвэл өнгөрсөн пүрэв гарагт “ХХ зуун Фокс” кино компани Малайз улсад анхныхаа кино паркыг нээхээр болсноо мэдэгджээ. Албан ёсны мэдээллээр тус парк нь 2016 онд нээгдэх гэнэ. Энэхүү паркаа Малайз улсад барих болсон шалтгаан нь Зүүн Өмнөд Ази болон Хятадын зах зээлд өөрийн кинонуудаа илүү ойртуулах зорилготой байгаа аж. Мөн “ХХ зуун Фокс”-ын мэдэгдсэнээр 300 сая ам.долларын өртгөөр босох энэхүү паркын ажил энэ зунаас эхлэх юм байна.