УДЭТ-ын орлогч захирлаас авхуулаад, захирал хүртэлх албыг тасралтгүй 36 жил хашсан Урлагийн гавьяат зүтгэлтэн Д.Цэрэнсамбуу өнөөдөр үүрэгт ажлаа хүлээлгэж өглөө. Түүний албыг Соёл, спорт, аялал жуулчлал, залуучуудын сайд Ч.Номингийн тушаалаар Төрийн соёрхолт, Урлагийн гавьяат зүтгэлтэн Н.Наранбаатар түр орлон гүйцэтгэхээр хүлээн авсан юм.
Д.Цэрэнсамбуу нь Монголын театрын урлагийн хөгжлийн төлөө залуу нас, авьяас чадвар, хөдөлмөр бүтээл, зүрх сэтгэлээ зориулан хамт олныхоо бахархал болон хүндлэгдэж ирсэн шилдэг удирдагч, менежер, продюсер юм. Тэрбээр УДЭТ-т ажиллах хугацаандаа театрынхаа тайзнаа дэлхийн сонгодог, үндэсний түүхэн, орчин үеийн сэдэвтэй 110 гаруй уран бүтээлийг үзэгчдийн хүртээл болгожээ. Түүнчлэн “Гоо марал”,”Гэгээн Муза” наадмуудаас гран при шагналыг удаа дараалан хүртэж, оны шилдэг уран бүтээл, уран бүтээлчийг тодруулдаг “Мөнгөн мод” наадам болон болон бусад нэр хүндтэй шагналуудаар шагнуулж байв.
Гавьяаныхаа амралтад гарч, хашсан албаа нэр төртэйгөөр хүлээлгэн өгч буй Д.Цэрэнсамбууг УДЭТ-ын хамт олон нь өнөөдөр театрынхаа тайзнаа ёслол төгөлдөр хүлээн авч, энэ үеэр УДЭТ-ын шинэ захиралд театрын тамга тэмдгийг гардуулан өгөх ёслол үйлдэв. Түүнчлэн УДЭТ-ын ахмад уран бүтээлчид болон өдгөө ажиллаж буй хамт олон нь, мөн Монгол улсад үйл ажиллагаа явуулж буй мэргэжлийн урлагийн байгууллагуудын удирдлагуудын төлөөлөл түүнд хүндэтгэл үзүүллээ.
УДЭТ-ын захирлын орлон гүйцэтгэгчээр томилогдоод буй Н.Наранбаатар “1931 онд мэргэжлийн урлагийн ууган эл байгууллагыг үүссэн цагаас хойш өнөөдрийг хүртэл 15 дарга халаа сэлгэн удирдаж иржээ. Эдгээр эрхмүүдийн нуруундаа үүрч ирсэн, уран бүтээлчдийн уран бүтээлээ туурвих нөхцөл бололцоог бүрдүүлж, академик шинж чанараа хадгалж, ард түмний оюуны хүч нь байж чадсан энэ театрыг өртөөчлөн авч явах болсондоо баяртай байна. Өртөөчлөн ирсэн эл байгууллагын уламжлалыг хадгалж, чиг баримжааг алдалгүй, өөрийн театрын түүхийг баяжуулж, ирээдүйн замналыг үргэлжлүүлж ажиллах болно” гэлээ.
