УДЭТ-ын захирал Н.Наранбаатар Унгар Улсын Будапешт хотын Үндэсний театрын захирал Аттила Виднянский болон бусад төлөөллийг хүлээн авч уулзлаа. Эл уулзалтаар УДЭТ-ын уран бүтээлчид Унгар улсад жил бүр зохион байгуулдаг МИТЕМ буюу Мадач олон улсын театрын 11 дэх уулзалтад оролцох, мөн Будапешт хотын Үндэсний театт “Тэнгэрийн хүү” түүхэн туульсын жүжгийг тоглох асуудлаар ярилцжээ.
Ирэх онд Монгол, Унгар хоёр улсын хооронд дипломат харилцаа тогтоосны 75 жилийн ой тохиох бөгөөд эл ойг тохиолдуулан УДЭТ-аас 2025 оны дөрөвдүгээр Унгар улсад Б.Цогнэмэхийн зохиол “Тэнгэрийн хүү” жүжгийг “Go Mongolia” уриан дор тоглож, олон улсын театрын уулзалтад оролцох асуудлыг дэмжих, хоёр орны соёлын харилцааг өргөжүүлэх чиглэлээр санал солилцсон байна.
Ташрамд дурдахад, МИТЕМ буюу Мадач олон улсын театрын 11 дэх уулзалт нь дэлхийн 30 гаруй орны театрын уран бүтээлчдийг нэгтгэн, өөрсдийн бүтээлээ танилцуулах боломж олгодог төдийгүй, театрын хөгжлийн чиг хандлага, улс хоорондын соёлын харилцааг бэхжүүлэх зорилгоор зохион байгуулдаг өргөн цар хүрээтэй арга хэмжээ юм байна.
