Амьдрал, уран бүтээлээ холбоод багагүй хугацааг үдэж буй дуучин Б.Болд, Э.Чулуунчимэг нар “Илбэе” нэртэй хамтарсан цомгоо гаргаж, “Нарантуул” олон улсын худалдааны төвд нээлтээ хийсэн билээ. Ард түмнийхээ дунд аялгуут сайхан уран бүтээлээрээ танигдсан учраас ийн шинэхэн цомгийнхоо дээжээс анхлан хүргэхээр шийдсэн тэдний баяр үнэхээр гайхалтай болсон гэдэг. Сонсогч фэнүүдээсээ зурагт бэлгэнд авсан дуучин хос шинэ жилийн баяраар хамгийн их эрэлттэй байгаа гэсэн.
Тэгвэл тун саяхан тэд “Илбэе” нэртэй хамтарсан тоглолтоо хийхээр товлож буйгаа дуулгалаа. Энэхүү тоглолт нь ирэх оны нэгдүгээр сарын 16, 17-нд Монгол бөхийн өргөөнд болох бөгөөд дуучин Б.Болд, Э.Чулуунчимэг нар өөрсдийн хамтран дуулсан хит дуунууд болон олны сэтгэлд хоногшсон шилдэг уран бүтээлүүдийг толилуулах юм байна. Мөн тэд урьд нь гавьяат жүжигчин С.Жавхлан, Т.Баясгалан нарын хамтран дуулсан “Насны хайр”, “Зөвхөн чамдаа”, “Яаж мартах юм бэ” зэрэг цөөнгүй хэдэн дууг сонсогч түмэндээ хүргэхээр төлөвлөжээ. Нийтийн дууны ертөнцөд хүч түрэн гарч ирж буй дуучин хос маань Б.Аялгуу хэмээх хөөрхөн охинтой гэдгийг уншигчид маань санаж байгаа биз ээ.
