Уянгалаг, хүчирхэг дуу хоолойгоороо өөрийн гэсэн сонсогчидтой болж чадсан жазз дуучин Ц.Хулан арваннэгдүгээр сарын 16-нд “Улаанбаатар” зочид буудлын эвент холлд өөрийн нэрээр нэрлэсэн тоглолтоо толилуулна. Эл тоглолтыг хөгжмийн зохиолч, продюссер Б.Наранзун хөтөлж, “THE HU” хамтлагийн үүсгэн байгуулагч Монгол Улсын Гавьяат жүжигчин, дуучин, продюсер, Б.Дашдондог, “Инээмсэглэл” хамтлагийн дуучин, Монгол Улсын Гавьяат жүжигчин, дуучин Н.Ганхуяг, “Шар айраг” хамтлагийн дуучин Буянаа болон Улсын филармонийн гоцлол дуучин Наагий нар хамтран ая дуугаа өргөх аж. Тоглолт хоёр хэсгээс бүрдэх бөгөөд эхний хэсэгт дэлхийн шилдэг классик жазз бүтээлүүд, хоёр дахь хэсэгт дуучин Ц.Хулангийн зүрх сэтгэлд хоногшсон дуунууд болон дуэтүүдийг шинэчилсэн найруулгаар сонордуулах юм байна.
Ташрамд дурдахад, дуучин Ц.Хулан өнөөдрийг хүртэл бие даасан гурван цомгоо сонсогчдодоо хүргэж байсан бөгөөд өдгөө пянзаа гаргахаар төлөвлөн ажиллаж байгаа аж. Түүнчлэн дууны уран бүтээлээ туурвихаас гадна эмэгтэйчүүдэд зориулсан “Гэрэлт” брэндээ үүсгэн байгуулж, өөрөө загвар зохион бүтээгчээр нь ажиллаж буй.
