УДЭТ-ын жүжигчин, Монголын моно жүжгийн төвийн тэргүүн, Гавьяат жүжигчин Ц.Баясгалан “Би Эдит Пиаф байна” нэг хүний мюзикл жүжгээ энэ арваннэгдүгээр сарын 8, 9,10-нд “On&Of продакшн хаус”-т толилуулах гэж байна. Эл жүжгийг Монголын театрын урлагийн нэрт найруулагч, Урлагийн гавьяат зүтгэлтэн Б.Баатар агсны найруулгаар одоогоос 10 жилийн өмнө анхлан тоглож байв.
1994 онд СУИС-ийг Хөдөлмөрийн баатар, Ардын жүжигчин Ц.Гантөмөрийн удирдлагад төгсөж, ажлын гараагаа “Орчин үе” театраас эхэлсэн Ц.Баясгалан 1997 онд Ардын жүжигчин Б.Мөнхдорж найруулагчийн урилгаар УДЭТ-ын босгыг давжээ. Тэрбээр А.П.Чеховын “Гэрлэх гэсэн нь” жүжгийн Наталья Степановнагийн дүрээр “Мэшил” театрын наадмын шилдэг эмэгтэй дүр, “Жүжигчид дуулж байна” улсын уралдаанд тэргүүн байр, Ф.Шиллерийн “Хар санаа, хайр сэтгэл” жүжгийн Мильфордын дүрээр “Дэлхийн сонгодог жүжиг” контемпорари уралдаанд тэргүүн байр, зохиолч С.Жаргалсайханы “Нууц амраг чинь болъё” жүжгийн Шүрийн дүрээр 2007 онд “Гэгээн Муза” олон улсын театрын наадмын шилдэг эмэгтэй гол дүр, В.Красногоровын “Солиотой жүжиг” жүжгийн Жаннагийн дүрээр 2010 онд “Гэгээн Муза” наадмын шилдэг эмэгтэй туслах дүр, 2014 онд оны шилдэг уран бүтээлчид олгодог “Мөнгөн мод” алтан цомын эзнээр тодорч байлаа.
Мөн түүнчлэн 2014 онд “Би Эдит Пиаф байна” моно жүжгээрээ Косово улсад болсон А зэрэглэлийн “Monо Akt festival”-д тэргүүлж байсан юм.
Тайзнаа анх толилуулсны 10 жилийнх нь ой тохиож буй “Би Эдит Пиаф байна” жүжигт Францын алдарт дуучин Эдит Пиафын тухай, түүний амьдрал дахь уналт босолт, түүний хайрлаж, хайрлуулж байсан эрчүүдийн тухай өгүүлэх бөгөөд “Hymne a l’Amour”, “La Vie en rose”, “No je ne regrette rien”, “Padam padam”, “Sous le ciel de Paris” зэрэг алдартай дуунуудыг сонсох боломжтой аж.
