Гавьяат тамирчин Э.Цэндбаатар нгөрсөн амралтын өдөр АНУ-ын Техас мужийн Эль-Пасо хотын “County сoliseum” ордонд мэргэжлийн боксын рингэнд 16 дахь тулаанаа хийж үнэмлэхүй ялалт байгуулсан.
Тэгвэл комедиан М.Баяржаргал Монгол Улсын Гавьяат тамирчин, боксчин Э.Цэндбаатарт хүссэн үедээ “Elite Travel” компаниар Хайнань аралд гэр бүлээрээ амрах эрхийн бичиг бэлэглэхээр болжээ.
Энэ тухайгаа М.Баяржаргал цахим хуудсандаа “Монгол Улсын Гавьяат тамирчин Э.Цэндбаатарт дэмжиж явдаг фены хувьд 16-0, WBC алтан бүсийн эзэн болсонд баяр хүргэн, гэр бүлээрээ Хайнаньд амрах эрх бэлэглэж байна.
Сайн байна уу, Гавьяатаа? Дэлхийн дэвжээнд Монгол Улсынхаа нэрийг цуурайтуулж, Монгол хүн ямар их тэсвэр тэвчээр, авьяас чадвартайг харуулж, бид бүхнийг бахархуулж яваа ах танд баярлалаа.
Бидэнд залуу хүн зогсохгүй, шантрахгүй байх ёстой гэдгийг та жинхэнэ утгаараа үлгэрлэж байна. “Надад бодсон юм байгаа” гэдэг үг олон олон залууст зүтгэх хүчийг өгсөн юм шүү!
Өдийг хүртэл танд зарим нэг амлалт өгөөд түүнийгээ биелүүлээгүй хүмүүс байгаа нь харамсалтай. Монгол хүн бүр тийм биш юм шүү. Залуус бид ондоо.
Миний хувьд бидний залуу үе ч гэсэн өөрсдийн боломж бололцоогоороо нэгнээ дэмжиж, амжилтаар нь бахархаж, урам өгч чаддаг байх ёстой гэж боддог юм.
Тиймээс өөрийн үүсгэн байгуулсан Elite Travel – Элит Трэвел компанийнхаа зүгээс, таны фанат мөн хувь хүнийхээ сэтгэлээр Э.Цэндбаатар аваргадаа гэр бүлээрээ Хайнань аралд аялан амрах эрхийн бичиг бэлэглэхээр шийдлээ.
Өдөр бүр хүнд бэлтгэл хийж, эх орныхоо нэрийн өмнөөс тэмцэж яваа аварга маань хайртай гэр бүлийнхэнтэйгээ халуун оронд алжаалаа тайлаад, сэргэлт аваарай. Тэгээд дараагийн өрсөлдөгчөө нам цохиорой. Та рингэн дээр Монголынхоо төлөө тулалддаг. Харин рингнээс буугаад бид таныг дэмжинэ. Цаашдын бүх тулаанд улам өндөр амжилт хүсье.
Хүндэтгэсэн
Залуу бизнес эрхлэгч, комедиан, боксын хорхойтон М.Баяржаргал” хэмээн нийтэлжээ.
