Монголын суут хөгжмийн зохиолч, Төрийн шагналт, Хөдөлмөрийн баатар, Урлагийн гавьяат зүтгэлтэн Б.Шарав мэргэжлийн дуучдад зориулсан “Намараа гэж” романсаа 1998 онд нэрт яруу найрагч Р.Чойномын “Намрын тухай бодол” шүлгээс сэдэвлэн бүтээжээ.
Энэхүү бүтээлийг орчин цагт мэргэжлийн уран бүтээлчид урын сандаа сонгон авч үзэгч олонд хүргэж байна. Тодруулбал, ДБЭТ-ын дуучин А.Наранбаатар, “Улаанбаатар” театрын гоцлол дуучин А.Отгонболд нарын хоёр тенор буюу цээл хоолойт дуучид өөрсдийн өнгө аясыг тусган эл уран бүтээлийг шинээр амилуулсан байна.
А.Наранбаатар, А.Отгонболд нар “Duo tenor” төслийг санаачлан “Херуб” энтертайнменттай хамтран бүтээхээр ажиллаж буй аж. Эл “Duo tenor” төслийн хүрээнд Монголын хөгжмийн зохиолчдын болон дэлхийн сонгодог дуунуудыг цээл хоолойт дуучид хамтран дуулж, олны хүртээл болгох юм байна.
