Монгол Улсын аялал жуулчлалын онцлох арга хэмжээнүүдийн нэг мөсний баярыг жил бүрийн гуравдугаар сард зохион байгуулдаг. Харин өнөө жилийнх Цагаан сарын баярын өдрүүдтэй давхцаж таарах учраас Хөвсгөл аймгийн Засаг даргын Тамгын газраас мөсний баярыг ирэх хоёрдугаар сарын 21-23-ны хооронд зохион байгуулах санал боловсруулж, шинээр байгуулсан Соёл, спорт, аялал жуулчлал, залуучуудын яаманд хүргүүлж, яамнаас “Хөх сувд-2025” мөсний баярыг ирэх оны хоёрдугаар сарын 13-23-нд зохион байгуулахаар шийдвэрлэсэн байна.
Анх 2000 онд “Далай ээж” хэмээн хүндлэн нэрлэдэг Хөвсгөл нуурыг хамгаалах, өвлийн аялал жуулчлалыг хөгжүүлэх зорилгоор Хөвсгөлийн тусгай хамгаалалттай газрын байгаль орчны байцаагчаар ажиллаж байсан Д.Лхагвацогт, Ж.Төмөрсүх нарын санаачилгаар Сантын өвөр гэдэг газар Мөсний баяр хийж, арваад чаргатай морины уралдаанд нутгийн иргэд оролцож байсан түүхтэй. Харин 2001 оноос Мөсний баярын хүрээ тэлсээр жил бүр уламжлал болгон тэмдэглэж, Монгол Улсад өвлийн аялал жуулчлалыг хөгжүүлэх нэгэн чухал эвент үйл ажиллагаа болж өргөжин хөгжиж байгаа юм. Өнгөрсөн жилийн “Хөх сувд-2024” мөсний баярт 20 мянга гаруй иргэн оролцсон гэсэн тоо бий аж.
