УДЭТ-ын хамт олон алтан үеийн болон ахмад уран бүтээлчдийнхээ алдрыг хүндэтгэж, бүтээж туурвих арга ухааныг нь хойч үедээ уламжлуулан үлдээх зорилгоор Соёл урлагийн их сургуулийн Театрын сургуультай хамтран “Бид мартахгүй” дурсамж, хүндэтгэлийн арга хэмжээг уламжлал болгон зохион байгуулдаг.
Энэхүү арга хэмжээний хүрээнд жил бүр зохион байгуулдаг театрын мэргэжлийн судлаач, эрдэмтэн, ахмад уран бүтээлчдийн “Ахмад үеийн арга туршлага-2024” эрдэм шинжилгээний бага хурлыг өчигдөр /2024.12.06/ сарын 06-нд зохион байгууллаа.
Эрдэм шинжилгээний хурлыг нээж УДУДЭТ-ызахирал, Төрийн соёрхолт, Урлагийн гавьяат зүтгэлтэн Н.Наранбаатар нээж үг хэллээ.
Энэхүү эрдэм шинжилгээний хурлыг Ардын багш, УГЗ, доктор (Ph.D), профессор Н.Ганхуяг болон СУИС-ийн ТУС-ийн ЯУТКС-ийн тэнхимийн эрхлэгч доктор (Ph.D) Б.Даваа нар удирдаж явуулав.
Тус эрдэм шинжилгээний хуралд:
• “Д.Дамдинсүрэнгийн дүр бүтээхүйн онцлог” сэдвээр УДЭТ-ын зохиолч-судлаач, СУИС-ийн ТУС-ийн багш Я.Баяраа
• “Л.Цогзолмаагийн амьдралын мөчлөг, эргэлтийн он жилүүд” сэдвээр Утга зохиол судлаач, доктор (Ph.D) Ү.Хүрэлбаатар
• “Эсрэг дүр бүтээх жүжигчний ажиллагаа (МУГЖ Н.Дугарсанжаагийн жишээнд…)” сэдвээр СУИС-ийн ТУС-ийн тэргүүлэх профессор, доктор (Ph.D) С.Болормаа
• “Б.Зоригийн театр судлал болон театрын боловсролд оруулсан хувь нэмэр” сэдвээр СУИС-ийн ТУС-ийн багш, доктор (Ph.D) Р.Нацагдоо
• “Жүжигчин Д.Мэндбаярын жүжиглэхүйн ур чадварын онцлог” сэдвээр СУИС-ийн дэд профессор, доктор (Ph.D) Д.Батсайхан
• “Монголын театр судлалд Дэ.Мягмарсүрэнгийн оруулсан хувь нэмэр” сэдвээр “Сити” их сургуулийн ахлах багш, судлаач Х.Чойдогжамц нар амжилттай илтгэл хэлцүүллээ.
