Стриминг үйлчилгээний “HBO Max” платформоос шидтэн хүү Харри Поттерын тухай цуврал хийхээр болсноо YouTube хуудсаараа дамжуулан албан ёсоор зарласан. Энэхүү цуврал нь нийт долоон бүлэг үргэлжлэх бөгөөд тус бүр Жоан Роулингийн боть номон дээр суурилсан аж. Төслийн гүйцэтгэх продюсерын ажлыг Нил Блэр, Рут Кенли-Леттс, Жоан Роулинг нар хариуцахаар болоод буй. Энэ талаар “HBO & Max content”-ын гүйцэтгэх захирал Кейси Блойс “Бид үзэгчдэд дахин нэг удаа тэс өөр өнцгөөс Хогвартсыг нээж илрүүлэх боломж олгож байгаадаа баяртай байна. Харри Поттер бол хүн төрөлхтний соёлын нэг хэсэг бөгөөд тус бүтээлийн шүтэн бишрэгчид ид шидийн ертөнцтэй холбоотой аль болох олон контент одоог хүртэл хүсэмжилсээр байдаг. Бид “Warner Bros.” болон Жоан Роулингтой хамтран зохиолын боть тус бүрийг дэлгэрэнгүй харуулсан цуврал бүтээх болно” хэмээсэн.
HBO-гийн зүгээс өнгөрсөн есдүгээр сард киноны гол дүрүүд болох Харри, Хермайни болон Рон нарын дүрд сонгон шалгаруулалт зарласан бөгөөд 32,000 гаруй хүүхэд өргөдлөө илгээгээд байгаа аж. Бусад дүрд тоглох жүжигчдийн нэрс одоогоор нууц хэвээр байгаа юм. Түүнчлэн цувралын зураг авалт 2026 онд эхлэх төлөвлөгөөтэй байгаа бөгөөд 2027 онд үзэгчдийн хүртээл болгохоор товлоод байгаа аж.
