Оюутан ахуйгаасаа “Маск” продакшнаас уран бүтээлийн гараагаа эхэлсэн Х.Цасчихэрийг “Босго тотго” олон ангит кино, “Соёлын довтолгоо”, “In da house”, “Ghost”, “Гэрэл”, “Алдарт ээжүүдийн ажил хаялт”, “Ээж”, “Чи өөрөө хайр”, “Тойрог” “Андгай” зэрэг уран сайхны кино, түүнчлэн “Орфей” театрын бүтээл, Ф.М.Достоевскийн “Гэм зэм” пост драмын жүжигт тоглосноор нь үзэгчид эчнээ мэднэ. Ардын жүжигчин, найруулагч Б.Мөнхдоржийн шавь тэрбээр өдгөө “Reaction” продакшн байгуулан, тайз, дэлгэцийн уран бүтээлүүдийг үзэгчдэд хүргэж буй. Өнгөрсөн хугацаанд Х.Цасчихэр тус продакшныхаа “Даариймаа”, “Reaction comedy”, “Хоолайнуу”, “Андээээ” зэрэг контентуудыг найруулан үзэгчдэд хүргэснээс гадна “Ghost” бүрэн хэмжээний уран сайхны кино, “Чи надад хайртай” мюзикл инээдмийн жүжгийг олны хүртээл болгосон. Тэгвэл тэрбээр тун удахгүй шинэ уран бүтээлээр үзэгчидтэй уулзах гэж байна. Тодруулбал, “Reaction” продакшн, “Хүннү эйр”, “Номадиа” пикчерстэй хамтран “Хайрын бэлэг” уран сайхны кино бүтээжээ. Тус киног Х.Цасчихэр найруулж, гол дүрүүдэд Гавьяат жүжигчин Н.Ариунболд, жүжигчин Б.Батмаа, О.Самданпүрэв, дуучин, жүжигчин Jason буюу Б.Баяржавхлан, Б.Ариунчимэг, Х.Намуун нар тогложээ. “Хайрын бэлэг” киног энэ долооо хоногоос Univision, LookTV, Ddish-ээр үзэгчдэд хүргэх юм байна.
