УДЭТ-ын эрдмийн театрын урилгаар өнгөрсөн аравдугаар сард Унгар улсын Бупадешт хотын үндэсний театрын захирал Аттила Виднянски, Унгарын улсын Бупадешт хотын үндэсний театрын зохиолч, МИТЕМ олон улсын театрын наадмын ерөнхий зохион байгуулагч Эдит Агота Кулсар нар манай улсад зочилж, Б.Цогнэмэхийн “Тэнгэрийн хүү” жүжгийг үзэж сонирхсон. Түүнчлэн эл уран бүтээлийг ирэх оны дөрөвдүгээр сард 12 дахь удаагаа зохион байгуулах МИТЕМ олон улсын театрын наадамд оролцуулж, Унгарын Будапешт хотын Үндэсний театрын тайзнаа тоглуулах албан ёсны урилгыг гардуулсан юм.
2014 оноос зрхион байгуулж буй МИТЕМ олон улсын театрын наадам нь Унгар улсад олон улсын театрын уулзалтууд зохион байгуулах зорилготой бөгөөд сүүлийн жилүүдэд тус хөтөлбөрийн хүрээнд Унгар улсын үзэгчид 30 гаруй театрын 200 гаруй тоглолтыг үзэх боломжтой болсон нь тус наадмын цар хүрээ, нэр хүндийг илтгэж буй. Өнөө жилийн МИТЕМ олон улсын театрын наадам 2025 оны дөрөвдүгээр сарын 25-наас тавдугаар сарын 25-ныг дуустал үргэлжлэх юм. Эл наадмыг “Тэнгэрийн хүү” түүхэн туульсын жүжгээр нээх бөгөөд манай уран бүтээлчд дөрөвдүгээр сарын 25, 26-нд жүжгээ Унгарын Будапешт хотын Үндэсний театрт толилуулахаар болжээ.
